മകനാണെന്ന ദമ്പതികളുടെ അവകാശവാദം; അടയാളപരിശോധനയ്ക്ക് ധനുഷ് കോടതിയില്
ചെന്നൈ: മകനാണെന്ന് അവകാശപ്പെട്ട് വൃദ്ധദമ്പതികള് നല്കിയ പരാതിയില് അടയാള പരിശോധനയ്ക്ക് തമിഴ് താരം ധനുഷ് മദ്രാസ് ഹൈക്കോടതിയുടെ മധുര ബഞ്ചിനു മുന്നില് ഹാജരായി. സര്ക്കാര് ഡോക്ടറുടെ സാന്നിധ്യത്തിലായിരിക്കും അടയാളപരിശോധന നടത്തുന്നത്. മധുര സ്വദേശിയായ കതിരേശനും ഭാര്യ മീനാക്ഷിയുമാണ് ധനുഷ് തങ്ങളുടെ ഇളയമകനാണെന്നും കുട്ടിക്കാലത്ത് നാടുവിട്ടുപോയതാണെന്നുമുള്ള അവകാശവാദവുമായി കോടതിയിലെത്തിയിരുന്നത്. ധനുഷ് മകനാണെന്ന തെളിവുകള് പക്കലുണ്ടെന്നും ആവശ്യമെങ്കില് ഡിഎന്എ പരിശോധനയ്ക്ക് തയ്യാറെന്നും വൃദ്ധദമ്പതികള് അറിയിച്ചു.
സ്കൂള് സര്ട്ടിഫിക്കറ്റുകളുടെ ഒറിജിനല് ഹാജരാക്കാന് കോടതി ആവശ്യപ്പെട്ടിരുന്നു. എന്നാല് കേസ് തള്ളണമെന്നായിരുന്നു ധനുഷിന്റെ ആവശ്യം. ദമ്പതികളുടെ വാദം അടിസ്ഥാന രഹിതമാണെന്നും അതിനു ആധാരമായി സ്കൂള് സര്ട്ടിഫിക്കറ്റിന്റെ കോപ്പിയും ജനനസര്ട്ടിഫിക്കറ്റും ധനുഷ് സമര്പ്പിച്ചിരുന്നു. എന്നാല് കോപ്പി വേണ്ടെന്നും സ്കൂള് സര്ട്ടിഫിക്കറ്റ് ഒറിജിനല് സമര്പ്പിക്കണമെന്നുമാണ് കോടതി ആവശ്യപ്പെട്ടു.
ധനുഷ് തങ്ങളുടെ മൂന്നാമത്തെ മകനാണെന്നും സ്കൂളില് പഠിക്കുമ്പോള് നാടുവിട്ടുപോയതാണെന്നുമാണ് ദമ്പതികളുടെ വാദം. ശിവഗംഗ ജില്ലയിലെ അറുമുഖംപിള്ളൈ ഹയര് സെക്കന്ഡറി സ്കൂളിലാണ് ധനുഷിനെ പഠിപ്പിച്ചതെന്നും അവിടെ ഗവണ്മെന്റ് ഹോസ്റ്റലില് ആയിരുന്നു ധനുഷ് താമസിച്ചതെന്നും ഇവര് പറയുന്നു. പിന്നീട് ചെന്നൈയിലേക്ക് മാറി സിനിമയില് സജീവമായതോടെ ഉപേക്ഷിച്ചെന്നും പറയുന്നു.
1985 നവംബര് ഏഴിന് ജനിച്ച ധനുഷിന്റെ യഥാര്ത്ഥ പേര് കാളികേശവന് എന്നാണെന്നും ദമ്പതികള് അവകാശപ്പെടുന്നു. പ്രായം ചെന്ന തങ്ങളുടെ ജീവിതച്ചെലവിനു മാസം 65,000 രൂപ വീതം ധനുഷ് നല്കണമെന്നാവശ്യപ്പെട്ടാണു കോടതിയെ സമീപിച്ചത്. ധനുഷിന്റെതാണെന്ന് അവകാശപ്പെടുന്ന പഴയ ഫോട്ടോയും ഇവര് തെളിവിനായി കോടതിയില് ഹാജരാക്കിയിട്ടുണ്ട്. കേസ് പരിഗണിച്ച മേലൂര് ജുഡീഷ്യല് മജിസ്ട്രേട്ട് കോടതി നേരിട്ടു ഹാജരാകാന് ധനുഷിനോടു നിര്ദേശിച്ചിരുന്നു.
എന്നാല് ചെന്നൈ എഗ്മോറിലെ സര്ക്കാര് ആശുപത്രിയില് 1983 ജൂലൈ 28നാണ് താന് ജനിച്ചതെന്ന് ധനുഷ് പറയുന്നു. വെങ്കടേഷ് പ്രഭുവെന്നാണ് ധനുഷിന്റെ യഥാര്ത്ഥപേര്. നിര്മ്മാതാവും സംവിധായകനുമായ കസ്തൂരി രാജയുടെയും വിജയലക്ഷ്മിയുടെയും മകനാണ് ധനുഷ്. രജനീകാന്തിന്റെ മകളും സംവിധായികയുമായ ഐശ്വര്യയാണ് ധനുഷിന്റെ ഭാര്യ. വെങ്കടേഷ് പ്രഭുവെന്നാണ് ധനുഷിന്റെ യഥാര്ത്ഥ പേര്. സംവിധായകന് ശെല്വരാഘവനാണ് ധനുഷിന്റെ സഹോദരന്.