പി.കെയിലെ രണ്ടാം ഗാനം

മുന്നാ ഭായ് എംബിബിഎസ്, ലഗേ രഹോ മുന്നാ ഭായ്, 3 ഇഡിയറ്റ്‌സ് എന്നീ സൂപ്പർഹിറ്റ് ചിത്രങ്ങൾക്ക് ശേഷം രാജ്കുമാർ ഹിറാനി സംവിധാനം ചെയ്യുന്ന ചിത്രം പികെയിലെ രണ്ടാം ഗാനം പുറത്തിറങ്ങി. ലവ് ഈസ് വെയ്സ്റ്റ് ഓഫ് ടൈം എന്ന് തുടങ്ങുന്ന ഗാനം പ്രണയം സമയം കൊല്ലിയാണ് എന്നാണ് പറയുന്നത്.

കാമുകിയുടെ പുറകെ വെറുതെ നടക്കുകയും അവളുടെ വർത്തമാനങ്ങൾ കേൾക്കുന്നതും ജോലിയൊന്നും ചെയ്യാതെ അവളെ തന്നെ നോക്കി നിൽക്കുകയും ചെയ്യുന്ന പ്രണയം വേസ്റ്റ് ഓഫ് ടൈമാണെന്നാണ് ഗാനത്തിലൂടെ ആമിർ ഖാൻ പറയുന്നത്. സോനു നിഗമും ശ്രേയ ഘോഷാലും ചേർന്ന് ആലപിച്ചിരിക്കുന്ന ഗാനത്തിന് ഈണം പകർന്നിരിക്കുന്നത് ശന്തനു മൊയ്ത്രയാണ്. ഗാനത്തിന്റെ വരികൾ എഴുതിയിരിക്കുന്നത് അഭിഷേക് വർമ്മയാണ്.

അഭിജിത്ത് ജോഷിയുടേതാണ് ചിത്രത്തിന്റെ കഥ. അഭിജിത്ത് ജോഷി, രാജ്കുമാർ ഹിറാനി, അമീർഖാൻ, ശ്രീരാഗ് നമ്പ്യാർ എന്നിവർ ചേർന്ന് തിരക്കഥ തയാറാക്കിയിരിക്കുന്നു. അമീർ ഖാൻ, സഞ്ജയ് ദത്ത്, അനുഷ്‌ക ശർമ്മ, ഡോളി ബിൻദ്ര, സുശാന്ത് സിങ് രാജ്പുത്ര്, ബോമൻ ഇറാനി, സൗരഭ് ശുക്ല, അമിൻ ഖാൻ തുടങ്ങിയവരാണ് ചിത്രത്തിലെ അഭിനേതാക്കൾ. ശന്തനു മൊയ്ത്രയെ കൂടാതെ അജയ് അതുൽ, യോ യോ ഹണിസിങ് തുടങ്ങിയവരാണ് ചിത്രത്തിലെ മറ്റ് ഗാനങ്ങൾക്ക് ഈണം പകർന്നിരിക്കുന്നത്.

വിധു ചോഹ്രീപ ഫിലിംസ്, രാജ് കുമാർ ഹിറാനി ഫിലിംസ്, യു ടിവി മോഷൻ പിക്‌ചേർഴ്‌സ് ഫിലിംസ് എന്നിവരുടെ ബാനറിൽ രാജ്കുമാർ ഹിറാനി, വിധു വിനോദ് ചോപ്ര, സിദ്ധാർഥ് റോയ് കപൂർ തുടങ്ങിയവർ ചേർന്നാണ് ചിത്രം നിർമ്മിക്കുന്നത്. ഡിസംബർ 19-ന് ചിത്രം തീയേറ്ററിലെത്തും.