ഹാപ്പിന്യൂ ഇയറിലെ നോൺസെൻസ് കി നൈറ്റ്

ഹാപ്പി ന്യൂ ഇയറിലെ നാലാമത്തെ ഗാനം പുറത്തിറങ്ങി. മിഖാസിംഗ് ആലപിച്ചിരിക്കുന്ന നോൺസെൻസ് കി നൈറ്റ് എന്ന ഗാനമാണ് പുറത്തിറങ്ങിയത്. വലിയൊരു മോഷണ ശ്രമത്തിന്റെ ഭാഗമായി ഡാൻസ് മത്സരത്തിൽ പങ്കെടുക്കുന്നതാണ് ഗാനത്തിന്റെ ഇതിവൃത്തം. ചിത്രത്തിലെ പ്രധാന അഭിനേതാക്കളെല്ലാം തന്നെ ഗാനത്തിൽ പ്രത്യക്ഷപ്പെടുന്നുണ്ട്. ഫറാ ഖാൻ, വിശാൽ ശേഖർ എന്നിവരുടെ വരികൾക്ക് വിശാൽ ശേഖർ കൂട്ടുകെട്ട് ഈണം പകർന്നിരിക്കുന്നു. കഴിഞ്ഞ ദിസവം പുറത്തിറങ്ങിയ ഗാനത്തിന്റെ വീഡിയോ ഇതുവരെ 1.3 ലക്ഷം ആളുകളാണ് കണ്ടിരിക്കുന്നത്.

ജീവിതത്തിൽ പരാജയപ്പെട്ടുപോയ ആറ് പേർ ഒരു വലിയ മോഷണത്തിനായി ഒരു ഡാൻസ് മത്സരത്തിൽ പങ്കെടുക്കുന്നതാണ് ചിത്രത്തിന്റെ ഇതിവൃത്തം. ചിത്രത്തിന്റെ തിരക്കഥ ഫറാഖാനും മയൂർ പുരിയും ചേർന്നാണ് ഒരുക്കിയിരിക്കുന്നത്. നാല് വർഷത്തെ ഇടവേളയ്ക്ക് ശേഷം ഫറാ ഖാൻ സംവിധാനത്തിലേയ്ക്ക് തിരിച്ചുവരുന്ന ചിത്രംകൂടിയാണ് ഹാപ്പി ന്യൂ ഇയർ. ഷാരൂഖ് ഖാനെ കൂടാതെ അഭിഷേക് ബച്ചൻ, ദീപിക പദ്‌കോൺ, സോനു സൂഡ്, ബോമൻ ഇറാനി, വിവാൻ ഷാ, ജാക്കി ഷറോഫ് എന്നിവരാണ് ചിത്രത്തിൽ അഭിനയിക്കുന്നത്.

ഇവരെ കൂടാതെ ദിനോ മോറിയ, പ്രഭു ദേവ, സാറ ജെയിൻ ഡയാസ്, മല്ലിക അറോറ ഖാൻ, അനുരാഗ് കശ്യപ്, വിശാൽ ദഡ്‌ലാനി, സാജിദ് ഖാൻ, അനുപം ഖേർ തുടങ്ങിയവർ അതിഥി താരങ്ങളായും എത്തുന്നുണ്ട്. ജോൺ സ്റ്റുവർട്ട് എഡ്യുറിയാണ് ചിത്രത്തിന്റെ പശ്ചാത്തല സംഗീതം ഒരുക്കിയിരിക്കുന്നത്. റെഡ് ചില്ലീസ് എന്റർടൈൻമെൻസിന്റെ ബാനറിൽ ഗൗരി ഖാൻ നിർമ്മിക്കുന്ന ചിത്രം അടുത്ത മാസം അവസാനം പ്രദർശനത്തിനെത്തും.