അച്ഛന് വേണ്ടി മാപ്പ് ചോദിക്കുന്നു; നെടുമുടി വേണുവിനോട് പരസ്യമായി മാപ്പ് അപേക്ഷിച്ച് തിലകന്റെ മകള്
കൊച്ചി: നെടുമുടി വേണുവിനോട് പരസ്യമായി മാപ്പ് അപേക്ഷിച്ച് തിലകന്റെ മകള് ഡോ. സോണിയ. കോട്ടണ്ഹില് എല്.പി സ്കൂളില് സംഘടിപ്പിച്ച പൊതുപരിപാടിയിലാണ് സംഭവം. അച്ഛന്റെ വാക്കുകള് വേണു സാറിനെ വേദനിപ്പിച്ചിട്ടുണ്ടെങ്കില് ഞാന് മാപ്പു ചോദിക്കുന്നുവെന്ന് സോണിയ പറഞ്ഞു. അതിരൂക്ഷമായ വിമര്ശനങ്ങളാണ് നെടുമുടി വേണുവിനെതിരെ വര്ഷങ്ങള്ക്ക് മുന്പ് തിലകന് ഉന്നയിച്ചത്. സിനിമയില് തന്നെ തകര്ക്കാന് നെടുമുടി ശ്രമിച്ചുവെന്നായിരുന്നു പ്രധാന ആരോപണം.
ഹിസ് ഹൈനസ് അബ്ദുള്ള, ഭരതം എന്നീ സിനിമകളിലെ തന്റെ വേഷം നെടുമുടി വേണു തട്ടിയെടുത്തുവെന്നായിരുന്നു തിലകന് ഉന്നയിച്ച ആരോപണം. എന്നാല് ഇത് അടിസ്ഥാനരഹിതമാണെന്ന് നെടുമുടി വേണുവും ചിത്രങ്ങളുടെ തിരക്കഥാകൃത്ത് ലോഹിതദാസും വ്യക്തമാക്കിയിരുന്നു. പക്ഷേ തന്റെ വിമര്ശനം പിന്വലിക്കാന് തിലകന് തയ്യാറായില്ല.
സോണിയയുടെ വാക്കുകള്
‘വേണു സാര് ഇരിക്കുന്ന ഈ വേദിയില് ഒരു കാര്യം പറയാതെ വയ്യ. എന്റെ അച്ഛനും വേണു സാറും തമ്മില് സിനിമാ ലോകത്തുണ്ടായ പ്രശ്നങ്ങളും ശത്രുതയും എല്ലാര്ക്കുമറിയാം. ആ പ്രശ്നം ഉള്ളപ്പോള് ഒരു ദിവസം വേണു സാറിന്റെ ഭാര്യ കുട്ടിയെയും കൂട്ടി വട്ടിയൂര്ക്കാവിലുള്ള എന്റെ ക്ലിനിക്കില് ചികിത്സയ്ക്ക് വന്നു. വേണു സാറിനോട് എനിക്കും വെറുപ്പ് തോന്നിയ നാളുകള്.’
‘പക്ഷേ, അദ്ദേഹത്തിന്റെ ഭാര്യ എന്നോട് പറഞ്ഞ വാക്കുകള് കേട്ടപ്പോള് ഞാനെത്രയോ ചെറുതായി എന്നെനിക്ക് തോന്നി. ‘തിലകന് ചേട്ടനും എന്റെ ഭര്ത്താവും തമ്മില് പല സിനിമാ പിണക്കങ്ങളും വഴക്കുമുണ്ടാവുമെന്നും നമുക്കിടയില് അതൊന്നും ഉണ്ടാവരുതെന്നും’ ക്ലിനിക്കില് നിന്ന് ഇറങ്ങാന് നേരം അവര് പറഞ്ഞു. ‘സോണിയ ഞങ്ങളുടെ വീട്ടില് വരണം. ക്ഷണിക്കുന്നു’. അടുത്തൊരു ദിവസം ഞാന് പോയി. ഊഷ്മളമായ സ്നേഹം ഞാനറിഞ്ഞു. അച്ഛന്റെ വാക്കുകള് വേണു സാറിനെ വേദനിപ്പിച്ചിട്ടുണ്ടെങ്കില് ഞാന് മാപ്പു ചോദിക്കുന്നു’-