കണ്ണന്താനത്തെ അഭിനന്ദിക്കാനായി ഒന്നുമില്ല; വിരുദ്ധാഭിപ്രായവുമായി വി.എസ്
തിരുവനന്തപുരം: അല്ഫോന്സ് കണ്ണന്താനത്തെ അഭിനന്ദിക്കാനായി ഒന്നുമില്ലെന്ന് വി.എസ്. അച്യുതാനന്ദന്. ഇടതുപക്ഷ സഹയാത്രികന് സംഭവിക്കാവുന്നതില് വെച്ച് ഏറ്റവും വലിയ അപചയമാണ് കണ്ണന്താനത്തിന് സംഭവിച്ചത്. രാജ്യത്ത് ഫാസിസം നടപ്പാക്കുന്നതിന്റെ ചാലകശക്തിയായും ചട്ടുകമായും ഒരു ഇടതുപക്ഷ സഹയാത്രികന് ഒരിക്കലും മാറാനാവരുതാത്തതാണെന്നും വിഎസ് വ്യക്തമാക്കി.
വ്യക്തിപരമായ സ്ഥാനലബ്ധിയെക്കാള് വലുതാണ് രാജ്യവും രാഷ്ട്രീയവും എന്ന് തിരിച്ചറിയേണ്ട സന്ദര്ഭത്തിലാണ് കണ്ണന്താനം ഫാസിസ്റ്റ് കൂടാരത്തിലെ സൗകര്യങ്ങള് തേടി അവിടേക്ക് ചേക്കേറുന്നത്. രാഷ്ട്രീയ ജീര്ണതയുടെ ലക്ഷണമാണ് അത്. അതുകൊണ്ടുതന്നെ, അതില് അഭിനന്ദനീയമായി ഒന്നുമില്ല.
സ്ഥാനാര്ത്ഥി നിര്ണയ സമയത്ത് കൂടുതല് ജാഗ്രത പുലര്ത്തണം എന്ന തിരിച്ചറിവുകൂടിയാണ് ഇത് ഇടതുപക്ഷത്തിന് നല്കുന്നതെന്നും ഒരുതരത്തിലും സന്ധിചെയ്യാന് വകുപ്പില്ലാത്ത ഒരു ഘട്ടത്തില്, തന്നെ രാഷ്ട്രീയത്തില് കൊണ്ടുവന്നതെന്ന് അദ്ദേഹം തന്നെ പറഞ്ഞ പ്രസ്ഥാനത്തെ തള്ളിപ്പറഞ്ഞ് ഫാസിസത്തോട് സന്ധിചെയ്യുകയാണ് കണ്ണന്താനം ചെയ്തതെന്നും ഭരണപരിഷ്കാര കമ്മീഷന് ചെയര്മാന് പറഞ്ഞു.