ഇന്നസെന്റിനോട് വിയോജിച്ച് വിമന് ഇന് സിനിമ കളക്ടീവ്; പോസ്റ്റ് കാണാം
സിനിമാ മേഖല ലൈംഗിക പീഡന വിമുക്തമാണെന്ന ഇന്നസെന്റിന്റെ പ്രസ്താവനയോട് വിയോജിച്ച് വിമന് ഇന് സിനിമ കളക്ടീവ്. ഫേസ്ബുക്ക് പോസ്റ്റിലാണ് സംഘടന വിയോജിപ്പ് അറിയിച്ചത്. നിലവിലുള്ള സാമൂഹ്യ ബന്ധങ്ങള് അതേപടി പ്രതിഫലിക്കപ്പെടുകയോ പുനരുല്പാദിപ്പിക്കപ്പെടുകയോ ചെയ്യുന്ന മേഖലയാണ് സിനിമയും എന്നാണ് തങ്ങള് മനസിലാക്കുന്നതെന്നും അവസരങ്ങള് ചോദിച്ച് വരുന്ന പുതുമുഖങ്ങളില് പലരും പലതരം ചൂഷണങ്ങള്ക്ക് വിധേയരാകുന്നുണ്ടെന്നും സംഘടന പറയുന്നു. സര്ക്കാര് നിയമിച്ച ജസ്റ്റിസ് ഹേമ കമ്മീഷന് ഈ വിഷയത്തില് കാര്യക്ഷമമായ അന്വേഷണം നടത്തുമെന്നാണ് പ്രതീക്ഷ. അതുകൊണ്ട് തന്നെ വസ്തുതകളെ കണ്ണടച്ച് ഇരുട്ടാക്കി നടത്തുന്ന ഇത്തരം പ്രസ്താവനകളില് ചലച്ചിത്ര മേഖലയിലുള്ളവര് ജാഗ്രത പുലര്ത്തണമെന്നും സംഘടന ആവശ്യപ്പെടുന്നു.
പോസ്റ്റില് വിശദീകരിക്കുന്നത് ഇങ്ങനെ
വിമെന് ഇന് സിനിമാ കളക്ടിവിനെ സ്വാഗതം ചെയ്തു കൊണ്ട് അമ്മ പ്രസിഡന്റ് ഇന്നസെന്റ് എടുത്ത നിലപാടിനോട് ഞങ്ങളുടെ നന്ദി അറിയിക്കുന്നു. പക്ഷേ ചലച്ചിത്ര മേഖല ലൈംഗിക പീഡന വിമുക്ത മേഖലയാണ് എന്ന മട്ടില് അദ്ദേഹം നടത്തിയ പ്രസ്താവനയോട് ഞങ്ങള് തീര്ത്തും വിയോജിക്കുന്നു. നിലവിലുള്ള സാമൂഹ്യ ബന്ധങ്ങള് അതേപടി പ്രതിഫലിക്കപ്പെടുകയോ പുനരുല്പാദിപ്പിക്കപ്പെടുകയോ ചെയ്യുന്ന മേഖലയാണ് സിനിമയും എന്നാണ് ഞങ്ങള് മനസ്സിലാക്കുന്നത്. സമൂഹത്തിലുള്ള മേല് കീഴ് അധികാരബന്ധങ്ങള് അതേപടി അവിടെയും ആവര്ത്തിക്കപ്പെടുന്നുണ്ട്. അവസരങ്ങള് ചോദിച്ചു ഈ മേഖലയിലേക്ക് കടന്നു വരുന്ന പുതുമുഖങ്ങളില് പലരും പലതരം ചൂഷണങ്ങള്ക്ക് വിധേയമാകേണ്ടി വരുന്നതും മേല് സൂചിപ്പിച്ച അധികാര ഘടന വളരെ ശക്തമായി ഇവിടെ നിലനില്ക്കുന്നതുകൊണ്ടാണ്.
എന്തിന് ,ഞങ്ങളുടെ സഹപ്രവര്ത്തകരായ ചിലര് കാസ്റ്റിംഗ് കൗച്ചിനെ കുറിച്ച് ഉറക്കെ സംസാരിച്ചതും ഈ അടുത്ത കാലത്താണ്. പാര്വ്വതി, ലക്ഷ്മി റായ് തുടങ്ങിയ നടിമാര് ഇതുമായി ബന്ധപ്പെട്ട് തങ്ങളുടെ അനുഭവങ്ങള് മാധ്യമങ്ങളുമായി പങ്കുവച്ചിരുന്നു. സര്ക്കാര് നിയമിച്ച ജസ്റ്റിസ് ഹേമ കമ്മീഷന് ഈ വിഷയത്തില് കാര്യക്ഷമമായ അന്വേഷണം നടത്തുമെന്നാണ് ഞങ്ങളുടെ പ്രതീക്ഷ. അതുകൊണ്ട് തന്നെ വസ്തുതകളെ കണ്ണടച്ച് ഇരുട്ടാക്കി കൊണ്ട് നടത്തുന്ന ഇത്തരം പ്രസ്താവനകളെ കുറിച്ച് ചലച്ചിത്ര മേഖലയിലുള്ളവര് ജാഗ്രത്താകണമെന്ന് വിമന് ഇന് സിനിമ കളക്ടീവ് ആവശ്യപ്പെടുന്നു.
പോസ്റ്റ് കാണാം