പാറ്റ് കമ്മിൻസ് ഇനി ഓസ്ട്രേലിയൻ ടെസ്റ്റ് ടീം ക്യാപ്റ്റൻ; നായകനാകുന്ന ആദ്യ ഫാസ്റ്റ് ബൗളർ
ആഷസ് പരമ്പരക്കുള്ള ഓസ്ട്രേലിയൻ ടീമിനെ പാറ്റ് കമ്മിൻസ് നയിക്കും. ഓസീസ് ടീമിന്റെ 47മത് ടെസ്റ്റ് ക്യാപ്റ്റനായ കമ്മിൻസ് നായകനാകുന്ന ആദ്യ ഫാസ്റ്റ് ബൗളർകൂടിയാണ്. സ്റ്റീവ് സ്മിത്താണ് വൈസ് ക്യാപ്റ്റൻ. റിച്ചി ബെനോക്ക് ശേഷം നായകനാകുന്ന ആദ്യ ബൗളറുമാണ് കമ്മിൻസ്.
ലൈംഗീക വിവാദത്തെ തുടർന്ന് സ്ഥാനം നഷ്ടമായ ടിം പൈനിന് പകരക്കാരനായിട്ടാണ് കമ്മിൻസിനെ നിയമിക്കുന്നത്. രണ്ട് വർഷമായി വൈസ് ക്യാപ്റ്റനുമായിരുന്നു കമ്മിൻസ്. "ഓസ്ട്രേലിയൻ ടീമിന്റെ നായകനായി തെരഞ്ഞെടുത്തത് അംഗീകരമായി കണക്കാക്കുന്നു. കഴിഞ്ഞ ഏതാനും വർഷമായി ടിം പൈൻ നൽകിയതു പോലുള്ള നേതൃത്വം ടീമിന് നൽകാൻ ഞാൻ ആഗ്രഹിക്കുന്നു. എന്നേയും സ്മിത്തിനേയും പോലുള്ള പരിചയ സമ്പന്നരായ ഏതാനും മുതിർന്ന താരങ്ങളും മികച്ച യുവനിരയുമുള്ള നല്ലൊരു ടീമാണ് ഇപ്പോൾ ഓസ്ട്രേലിയ. അതിനാൽ തന്നെ ഇത് വലിയ അംഗീകരാവുമാണ്". കമ്മിൻസ് പ്രസ്താവനയിൽ പറഞ്ഞു.
മുപ്പത്തിനാല് ടെസ്റ്റുകളിൽ നിന്നായി 164 വിക്കറ്റുകളാണ് കമ്മിൻസ് വീഴ്ത്തിയിട്ടുള്ളത്. 2011ലാണ് അരങ്ങേറ്റം. പിന്നീട് പരിക്കു കാരണം മാറി നിൽക്കേണ്ടി വന്നു. ഡിസംബർ 8ന് ഗാബയിലാണ് ആദ്യ ടെസ്റ്റ്.