ഡോളീ കി ഡോലിയിലെ പുതിയ ഗാനം

സോനം കപൂർ നായികയായി എത്തുന്ന ചിത്രം ഡോളീ കി ഡോലിയിലെ ആദ്യ പ്രണയഗാനം പുറത്തിറങ്ങി. പ്രണയം ഇതിവൃത്തമായ ഗാനം ആദ്യമായാണ് പുറത്തിറങ്ങുന്നത്. പാക്കിസ്ഥാൻ ഗസൽഗായകൻ റാഹത്ത് ഫത്തേഹ് അലിഖാനാണ് ഗാനം ആലപിച്ചിരിക്കുന്നത്. കുമാറിന്റെ വരികൾക്ക് സാജിദ് വാജിദാണ് ഈണം പകർന്നിരിക്കുന്നത്.

ഒരു പോലീസ് ഇൻസ്‌പെക്ടർ അടക്കം മൂന്ന് യുവാക്കളെ വിവാഹം കഴിച്ച് അവരുടെ വീടുകളിലെ പണവും സ്വർണ്ണാഭരണങ്ങളുമായി സോനം അവതരിപ്പിക്കുന്ന ഡോളി എന്ന കഥാപാത്രം മുങ്ങുന്നതും, ഇവർ ഡോളിയെ അന്വേഷിച്ചിറങ്ങുന്നതും ഡോളിയുടെ തട്ടിപ്പിന്റെ കഥകൾ മനസിലാക്കുന്നതുമാണ് ചിത്രത്തിന്റെ ഇതിവൃത്തം.

അഭിഷേക് ഡോഗ്രയാണ് ഡോളീ കി ഡോലി എന്ന റൊമാന്റിക്ക് കോമഡി സംവിധാനം ചെയ്യുന്നത്. അഭിഷേക് ഡോഗ്രയും ഉമാശങ്കർ സിങും ചേർന്നാണ് ചിത്രത്തിന്റെ തിരക്കഥ തയ്യാറാക്കിയിരിക്കുന്നത്. സോനം കപൂർ, പുൽകിത് സാമ്രാട്ട്, രാജ്കുമാർ റാവു, വരുൺ ശർമ്മ തുടങ്ങിയവരാണ് ചിത്രത്തിൽ അഭിനയിക്കുന്നത്. ഇവരെ കൂടാതെ സെയ്ഫ് അലി ഖാൻ, മലെയ്ക അറോറ ഖാൻ എന്നിവർ ചിത്രത്തിൽ അതിഥി താരങ്ങളായി എത്തുന്നുണ്ട്. അർബ്ബാസ് ഖാൻ പ്രൊഡക്ഷൻസിന്റെ ബാനറിൽ അർബ്ബാസ് ഖാനും മലെയ്ക അറോറ ഖാനും ചേർന്ന് നിർമ്മിക്കുന്ന ചിത്രം 23ന് തീയേറ്ററുകളിലെത്തും.