പികെയിലെ നാലാം ഗാനം
ആരാധകർ ഏറെ ആകാംഷയോടെ കാത്തിരിക്കുന്ന പികെയിലെ നാലാം ഗാനം നങ്ക പുങ്ക ദോസ്ത് പുറത്തിറങ്ങി. സ്വാനന്ദ് കിർകിറെയുടെ വരികൾക്ക് ശന്തനു മൊയ്ത്ര ഈണം പകർന്നിരിക്കുന്നു. ഗാനം ആലപിച്ചിരിക്കുന്നത് ശ്രേയ ഘോഷാലാണ്.
തന്റെ ചിത്രങ്ങളിലെ ആക്ഷേപഹാസ്യങ്ങളിലൂടെ സാമൂഹിക വിമർശനം നടത്തുന്ന സംവിധായകൻ രാജ്കുമാർ ഹിറാനി, മുന്നാഭായ് എംബിബിഎസ്, ലഗേ രഹോ മുന്നാഭായ്, ത്രീ ഇഡിയറ്റ്സ് എന്നി ചിത്രങ്ങൾക്ക് ശേഷം രചനയും സംവിധാനവും ചെയ്യുന്ന ചിത്രമാണ് പികെ.
അഭിജിത്ത് ജോഷി, രാജ്കുമാർ ഹിറാനി, ആമിർഖാൻ, ശ്രീരാഗ് നമ്പ്യാർ എന്നിവർ ചേർന്നാണ് ചിത്രത്തിന്റെ തിരക്കഥ തയാറാക്കിയിരിക്കുന്നത്.
ആമിർ ഖാൻ, സഞ്ജയ് ദത്ത്, അനുഷ്ക ശർമ്മ, ഡോളി ബിൻദ്ര, സുശാന്ത് സിങ് രാജ്പുത്ര്, ബോമൻ ഇറാനി, സൗരഭ് ശുക്ല, അമിൻ ഖാൻ തുടങ്ങിയവരാണ് ചിത്രത്തിലെ അഭിനേതാക്കൾ. ശന്തനു മൊയ്ത്രയെ കൂടാതെ അജയ് അതുൽ, യോ യോ ഹണിസിങ് തുടങ്ങിയവരാണ് ചിത്രത്തിലെ മറ്റ് ഗാനങ്ങൾക്ക് ഈണം പകർന്നിരിക്കുന്നത്.
വിധു ചോപ്രാ ഫിലിംസ്, രാജ് കുമാർ ഹിറാനി ഫിലിംസ്, യു ടിവി മോഷൻ പിക്ചേർഴ്സ് ഫിലിംസ് എന്നിവരുടെ ബാനറിൽ രാജ്കുമാർ ഹിറാനി, വിധു വിനോദ് ചോപ്ര, സിദ്ധാർഥ് റോയ് കപൂർ തുടങ്ങിയവർ ചേർന്നാണ് ചിത്രം നിർമ്മിക്കുന്നത്. 19-ന് ചിത്രം തീയേറ്ററിലെത്തും.
