സംസ്ഥാനത്തെ ഏറ്റവും വലിയ ഐടി തൊഴില്മേള റിബൂട്ട് 24; രജിസ്ട്രേഷന് 12,000 പിന്നിട്ടു
| Aug 14, 2024, 10:54 IST
കോഴിക്കോട്: സംസ്ഥാനത്തെ ഏറ്റവും വലിയ ഐടി തൊഴില്മേളയായ 'റിബൂട്ട് 24' ന്റെ ഓണ്ലൈന് രജിസ്ട്രേഷന് 12,000 പിന്നിട്ടു. ആഗസ്റ്റ് 17 ചൊവ്വാഴ്ച കോഴിക്കോട്ടെ കാലിക്കറ്റ് ട്രേഡ് സെന്ററിലാണ് 'റീബൂട്ട് 24' നടക്കുന്നത്. ഗവ. സൈബര്പാര്ക്കും കാലിക്കറ്റ് ഫോറം ഫോര് ഇന്ഫര്മേഷന് ടെക്നോളജി(കാഫിറ്റ്)യും സംയുക്തമായാണ് മേള സംഘടിപ്പിക്കുന്നത്.
https://reboot.cafit.org.in/ എന്ന ലിങ്കിലൂടെ സൗജന്യമായി തൊഴില്മേളയില് രജിസ്റ്റര് ചെയ്യാം. 100 ലേറെ കമ്പനികള് പങ്കെടുക്കുന്ന ഈ മെഗാമേളയില് 1500 ലധികം തൊഴിലവസരങ്ങളാണ് ഉണ്ടാകുന്നത്.
സംസ്ഥാനത്തിന്റെ എല്ലാ ഭാഗത്തു നിന്നും ഉദ്യോഗാര്ത്ഥികള് ഓണ്ലൈനായി രജിസ്റ്റര് ചെയ്തിട്ടുണ്ട്. ഇതിനു പുറമെ കോയമ്പത്തൂര്, ചെന്നൈ, ബംഗളുരു തുടങ്ങിയ സ്ഥലങ്ങളില് നിന്നും രജിസ്ട്രേഷനുണ്ട്.
ബംഗളുരു, ചെന്നൈ പോലുള്ള നഗരങ്ങളില് നിന്നു വരെ കോഴിക്കോടേക്ക് ഉദ്യോഗാര്ത്ഥികള് വരാന് താത്പര്യം കാണിക്കുന്നത് ഏറെ ശുഭപ്രതീക്ഷ നല്കുന്ന കാര്യമാണെന്ന് ഗവ. സൈബര് പാര്ക്ക് ജനറല് മാനേജര് വിവേക് നായര് ചൂണ്ടിക്കാട്ടി. ചടുലമായ ഐടി ആവാസവ്യവസ്ഥയാണ് കോഴിക്കോടിനെ കാത്തിരിക്കുന്നതെന്നും അദ്ദേഹം പറഞ്ഞു.
പരിചയസമ്പന്നരും തുടക്കക്കാരും ഒരു പോലെ രജിസ്ട്രേഷന് താത്പര്യം കാണിക്കുന്നുണ്ടെന്ന് കാഫിറ്റ് പ്രസിഡന്റ് അബ്ദുള് ഗഫൂര് കെ വി അറിയിച്ചു. ഓണ്ലൈനായി രജിസ്റ്റര് ചെയ്യാന് പറ്റാത്തവര്ക്ക് സ്പോട്ട് രജിസ്ട്രേഷനും ഒരുക്കിയിട്ടുണ്ട്. ഗവ. സൈബര് പാര്ക്കിനെ കൂടാതെ യുഎല് സൈബര്പാര്ക്ക്, കിന്ഫ്ര ഐടി പാര്ക്ക്, ഹൈലൈറ്റ് ബിസിനസ് പാര്ക്ക് തുടങ്ങി വിവിധ പാര്ക്കുകളില് നിന്നുള്ള കമ്പനികള് മേളയില് പങ്കെടുക്കും.
ഫ്യൂച്ചറ ലാബ്, കേരള നോളഡ്ജ് ഇക്കോണമി മിഷന്, ഇ-സ്റ്റോര്, ടിക്കറ്റ് ഫോര് ഇവന്റ്സ് എന്നിവരും പരിപാടിയുമായി സഹകരിച്ച് പ്രവര്ത്തിക്കുന്നുണ്ട്.
