മലെയ്കയുടെ ഐറ്റം ഡാൻസ് വൈറലാകുന്നു

ഡോളീ കി ഡോലി എന്ന ചിത്രത്തിലെ ഫാഷൻ ഖദം എന്ന ഗാനത്തിലാണ് മലെയ്കയുടെ ഐറ്റം ഡാൻസ്. സാജിദ് വാജിദാണ് ഗാനത്തിന് ഈണം പകർന്നിരിക്കുന്നത്. മമ്ത ശർമ്മയും വാജിദും ചേർന്നാണ് ഗാനം ആലപിച്ചിരിക്കുന്നത്. കഴിഞ്ഞ ദിവസം ചിത്രത്തിന്റെ ഫേസ്ബുക്ക് പേജിലൂടെ പുറത്തിറങ്ങിയ ഐറ്റം ഡാൻസിന് മികച്ച പ്രതികരണമാണ് ലഭിക്കുന്നത്. നേരത്തെ ചിത്രത്തിലെ ഫട്ടേ തക്ക് നാച്ചേങ്കി എന്ന ഗാനം പുറത്തിറങ്ങിയിരുന്നു.

വിവാഹ തട്ടിപ്പുകാരിയായി സോനം കപൂർ ചിത്രത്തിൽ എത്തുന്നത്.  മൂന്ന് യുവാക്കളെ വിവാഹം കഴിച്ച് അവരുടെ വീടുകളിലെ പണവും സ്വർണ്ണാഭരണങ്ങളുമായി സോനം മുങ്ങുന്നതും, യുവാക്കൾ സോനത്തെ അന്വേഷിച്ചിറങ്ങുന്നതുമാണ് ചിത്രത്തിന്റെ ഇതിവൃത്തം. അഭിഷേക് ഡോഗ്രയാണ് ഡോളീ കി ഡോലി എന്ന റൊമാന്റിക്ക് കോമഡി സംവിധാനം ചെയ്യുന്നത്.

അഭിഷേക് ഡോഗ്രയും ഉമശങ്കർ സിങും ചേർന്നാണ് ചിത്രത്തിന്റെ തിരക്കഥ തയ്യാറാക്കിയിരിക്കുന്നത്. സോനം കപൂർ, പുൽകിത് സാമ്രാട്ട്, രാജ്കുമാർ റാവു, വരുൺ ശർമ്മ തുടങ്ങിയവരാണ് ചിത്രത്തിൽ അഭിനയിക്കുന്നത്. ഇവരെ കൂടാതെ സെയ്ഫ് അലി ഖാൻ, മലെയ്ക അറോറ ഖാൻ എന്നിവർ ചിത്രത്തിൽ അതിഥി താരങ്ങളായി എത്തുന്നുണ്ട്. അർബ്ബാസ് ഖാൻ പ്രൊഡക്ഷൻസിന്റെ ബാനറിൽ അർബ്ബാസ് ഖാനും മലെയ്ക അറോറ ഖാനും ചേർന്ന് നിർമ്മിക്കുന്ന ചിത്രം ജനുവരിയിൽ തീയേറ്ററുകളിലെത്തും.