തേവറിലെ ഐറ്റം ഗാനം

രണ്ടര കോടി രൂപ മുടക്കി നിർമ്മിച്ചിരിക്കുന്ന തേവറിലെ ഐറ്റം ഗാനം രാധാ നാച്ചേംഗി പുറത്തിറങ്ങി. ഗാനത്തിൽ സോനാക്ഷി സിൻഹ അണിയുന്ന വസ്ത്രം 75 ലക്ഷം രൂപമുടക്കിയാണ് നിർമ്മാതാക്കൾ ഒരുക്കിയിരിക്കുന്നത്. സ്വർണ്ണവും വെള്ളിയും മുത്തുകളും അടങ്ങിയ വസ്ത്രം ഒരു പക്ഷേ ഐറ്റം ഡാൻസുകളുടെ ചരിത്രത്തിലെ തന്നെ ഏറ്റവും വിലകൂടിയ വസ്ത്രമായിരിക്കും.

സാജിദ്‌വാജിദ് കൂട്ടുകെട്ടാണ് ഐറ്റം ഗാനത്തിന് ഈണം പകർന്നിരിക്കുന്നത്. ഋതു പതക്ക്, ഷബാബ് സാബ്രി, ധനിഷ് സാബ്രി തുടങ്ങിയവർ ചേർന്നാണ് ഗാനം ആലപിച്ചിരിക്കുന്നത്. കൗസർ മുനീറാണ് ഗാനത്തിന്റെ വരികൾ എഴുതിയിരിക്കുന്നു.

2003-ൽ തെലുങ്കിൽ പുറത്തിറങ്ങിയ മഹേഷ് ബാബു ചിത്രമായ ഒക്കണ്ടുവിന്റെ ഹിന്ദി പതിപ്പാണ് തേവർ. 2004-ൽ ഒക്കണ്ടുവിന്റെ തമിഴ് പതിപ്പ് ഗില്ലി എന്ന പേരിൽ പുറത്തിറങ്ങിയിരുന്നു. തമിഴിലും തെലുങ്കിലും സൂപ്പർഹിറ്റായി ഓടിയ ചരിത്രം ആവർത്തിക്കാനാണ് തേവറും എത്തുന്നത്. നേരത്തെ പുറത്തിറങ്ങിയ ചിത്രത്തിന്റെ ട്രെയിലറിനും സൂപ്പർമാൻ എന്ന ആദ്യഗാനത്തിനുംമികച്ച പ്രതികരണമാണ് ലഭിച്ചത്. സോനാക്ഷി സിൻഹയുടെ ഐറ്റം ഡാൻസ് കൂടാതെ ശ്രുതി ഹാസന്റെ ഐറ്റം ഡാൻസും ചിത്രത്തിലുണ്ടാകും.

സോനാക്ഷി സിൻഹയും അർജുൻ കപൂറും പ്രധാന വേഷത്തിൽ എത്തുന്ന സിനിമ സംവിധാനം ചെയ്യുന്നത് അമിത് ശർമ്മയാണ്. ഇരുവരേയും കൂടാതെ മനോജ് ബാച്ച്‌പേയ്, ഖാദർ ഖാൻ, ശ്രുതി ഹാസൻ എന്നിവരും ചിത്രത്തിൽ അഭിനയിക്കുന്നുണ്ട്. ഗുണശേഖറിന്റെ കഥയ്ക്ക് ശന്തനു ശ്രീവാസ്തവയാണ് തിരക്കഥ എഴുതിയിരിക്കുന്നത്. സാജിദ്‌വാജിദ് കൂട്ടുകെട്ട് ഗാനങ്ങൾക്ക് ഈണം പകർന്നിരിക്കുന്നു. ബോണി കപൂറും സഞ്ജയ് കപൂറും ചേർന്ന് നിർമ്മിക്കുന്ന ചിത്രം 2015 ജനുവരി ഒമ്പതിന് തീയേറ്ററുകളിലെത്തും.