നടിയെ ആക്രമിച്ച സംഭവം; ഇടവേള ബാബു കൂറുമാറി, പുതിയ മൊഴി പ്രതി ദിലീപിന് അനുകൂലം
കൊച്ചി: നടിയെ ആക്രമിച്ച കേസില്‍ ഇടവേള ബാബു കൂറുമാറി. ‘അമ്മ’യുടെ ജനറല്‍ സെക്രട്ടറി കൂടിയായ ഇടവേള ബാബു പ്രോസിക്യൂഷന്‍ സാക്ഷിയാണ്. പുതിയ മൊഴി കേസിലെ മുഖ്യപ്രതിയായ നടന്‍ ദിലീപിന് അനുകൂലമാണ്. കൊച്ചിയില് നടന്ന വിസ്താരത്തിനിടെയാണ് പൊലീസിന് നേരത്തെ ബാബു നല്‍കിയ മൊഴി തിരുത്തി പറഞ്ഞിരിക്കുന്നത്. നടി ആക്രമണ കേസില്‍ ഇതാദ്യമായിട്ടാണ് ഒരു സാക്ഷി കൂറുമാറി പ്രതിക്കൊപ്പം ചേരുന്നത്.
കേസിലെ പ്രതിയായ ദിലീപ് തന്റെ അവസരങ്ങള്‍ നഷ്ടപ്പെടുത്തുന്നതായി നടി തന്നോട് പറഞ്ഞിരുന്നുവെന്നാണ് ബാബു പൊലീസിന് മൊഴി നല്‍കിയത്. കൂടാതെ ഇക്കാര്യം ദിലീപിനോട് പറഞ്ഞപ്പോള്‍ അനാവശ്യ കാര്യങ്ങളില്‍ ഇടപെടരുതെന്ന് തന്നെ താക്കീത് ചെയ്തിരുന്നുവെന്നും ബാബുവിന്റെ മൊഴിയില്‍ പറയുന്നുണ്ട്. ‘അമ്മ’ കൊച്ചിയില് സംഘടിപ്പിച്ച പരിപാടിയുടെ റിഹേഴ്സല് ക്യാംപില് വെച്ച് നടിയോട് ദിലീപ് മോശമായി പെരുമാറിയിരുന്നുവെന്നും ബാബു പൊലീസിനോട് പറഞ്ഞിരുന്നു. എന്നാല്‍ വിസ്താരത്തിനിടെ ഇതെല്ലാം ബാബു തള്ളി.
ചില കാര്യങ്ങള്‍ ഓര്‍മയില്ലെന്നായിരുന്നു ബാബു കോടതിയില്‍ പറഞ്ഞത്. ഇതോടെ ബാബു കൂറുമാറിയതായി പ്രഖ്യാപിക്കണമെന്ന് പ്രൊസിക്യൂഷന്‍ ആവശ്യപ്പെട്ടു. ഇത് കോടതി അംഗീകരിക്കുകയും ചെയ്തു. കാവ്യാ മാധവന്റെ അമ്മ ശ്യാമളയെ ഇന്ന് വിസ്തരിക്കാന്‍ തീരുമാനിച്ചിരുന്നെങ്കിലും സമയക്കുറവ് മൂലം നടന്നില്ല. കേസില്‍ ദിലീപിനെ പ്രതിചേര്‍ത്തതിന് പിന്നാലെ താരസംഘടനയായ ‘അമ്മ’ ദിലീപിനെ പുറത്താക്കിയിരുന്നു
