മാമുക്കോയയുടെ വീട്ടിലെ പശുവിനെ ഞാന് അടിച്ചു മാറ്റും, ‘ജയ് പശു, ചാണകം, പിണ്ണാക്ക്; ട്രോളുമായി ഹരീഷ് പേരടി
തിരുവനന്തപുരം: മുസ്ലിങ്ങളുടെ വീട്ടിലെ പശുക്കളെ പിടിച്ചെടുക്കണമെന്ന ഉത്തര്പ്രദേശ് ബി.ജെ.പി നേതാവിന്റെ പ്രസ്താവനയെ ട്രോളി നടന് ഹരീഷ് പേരടി. ഹിന്ദുക്കളായ ദാസനെയും വിജയനെയും ദുബായിയാണെന്ന് പറഞ്ഞ് പറ്റിച്ച് മദ്രാസില് ഇറക്കിവിട്ടതിനുള്ള ശിക്ഷയായി മാമുക്കോയയുടെ പശുവിനെ അടിച്ച് മാറ്റുമെന്ന് ഹരീഷ് പേരടി ഫെയ്സ്ബുക്കില് കുറിച്ചു. മുസ്ലിങ്ങള് വീട്ടില് പശുവിനെ വളര്ത്തുന്നത്. ലൗ ജിഹാദായി കണക്കാക്കി പിടിച്ചെടുക്കണമെന്നായിരുന്നു യു.പിയിലെ ബിജെപി നേതാവ് രഞ്ജിത് ശ്രീവാസ്തവ പറഞ്ഞത്.
ഹിന്ദു പെണ്കുട്ടികളെ മുസ്ലിം ചെറുപ്പക്കാര് വിവാഹം ചെയ്യുന്നതിനെയാണ് ലവ് ജിഹാദ് എന്ന് സംഘപരിവാര് വിളിക്കുന്നത്. മുസ്ലിങ്ങള് പശു വളര്ത്തുന്നതും ജിഹാദിന്റെ ഭാഗമാണെന്നായിരുന്നു രഞ്ജിത് ശ്രിവാസ്തവ പറഞ്ഞത്. പ്രസ്താവനയ്ക്ക് പിന്നാലെ ഇയാള്ക്കെതിരെ രൂക്ഷമായ വിമര്ശനമാണ് ഉയര്ന്നിരിക്കുന്നത്.
‘മാമുക്കോയയുടെ ആലയിലിരുന്ന് ചിരിക്കുന്നത് യഥാര്ത്ഥ സഹോദരിയായിരുന്നുവെന്ന് ഇന്നാണ് മനസിലായത്’. മാമുക്കോയയെ അല്ല മാമുക്കോയയുടെ പശുവിനെയാണ് ഞാന് സ്നേഹിക്കേണ്ടത് എന്ന പുതിയ അറിവ് എന്നിലേക്ക് പകര്ന്ന് തന്ന സഹോദരങ്ങളോടുള്ള എന്റെ നന്ദി എങ്ങിനെയാണ് പ്രകടിപ്പിക്കേണ്ടത് എന്ന് എനിക്കറിയില്ലയെന്നും ജയ് പശു, ജയ് ചാണകം, ജയ് പിണ്ണാക്ക് എന്നുമാണ് താരം ഫേസ്ബുക്കില് കുറിച്ചത്.
ഫേസ്ബുക്ക് കുറിപ്പിന്റെ പൂര്ണരൂപം
ഞാനിത്രയും കാലം ഈ മന്യഷ്യനെ ഇക്കാ… എട്ടാ… എന്നൊക്കെ വിളിക്കുമ്പോള് ഇദ്ദേഹത്തിന്റെ വീട്ടിലെ പശു എന്നെ നോക്കി ചിരിക്കുമായിരുന്നു … ഹിന്ദുവായ എന്റെ യഥാര്ത്ഥ സഹോദരിയാണ് മാമുക്കോയയുടെ ആലയിലിരുന്ന് ചിരിക്കുന്നത് എന്ന് ഇന്നാണ് എനിക്ക് മനസ്സിലായത്.
മാമുക്കോയയെ അല്ല മാമുക്കോയയുടെ പശുവിനെയാണ് ഞാന് സ്നേഹിക്കേണ്ടത് എന്ന പുതിയ അറിവ് എന്നിലേക്ക് പകര്ന്ന് തന്ന സഹോദരങ്ങളോടുള്ള എന്റെ നന്ദി എങ്ങിനെയാണ് പ്രകടിപ്പിക്കേണ്ടത് എന്ന് എനിക്കറിയില്ലാ… ഹിന്ദുക്കളായ ദാസനെയും വിജയനെയും ദുബായിയാണെന്ന് പറഞ്ഞ് പറ്റിച്ച് മദ്രാസില് ഇറക്കിവിട്ടതിനുള്ള ശിക്ഷ ഞാനി മനുഷ്യന്റെ പശുവിനെ അടിച്ച് മാറ്റി പകരം വീട്ടും… ജയ് പശു … ജയ് ചാണകം …ജയ് പിണ്ണാക്ക് …
