പ്രേമം എങ്ങനെ ഹിറ്റായി? ബാലചന്ദ്ര മേനോൻ പറയുന്നു

മലയാളക്കരയെ ഇളക്കി മറിച്ച ചിത്രം പ്രേമം ഹിറ്റായതിനെക്കുറിച്ച് കുടുംബ സിനിമകളുടെ സംവിധായകൻ ബാലചന്ദ്ര മേനോൻ ഫേസ്ബുക്കിൽ കുറിച്ചത് വൈറലായി. മനുഷ്യന്റെ ഗൃഹാതുരത്വം നിറഞ്ഞ ഭൂമിയിൽ പ്രേമം പുഷ്പവൃഷ്ടി നടത്തിയെന്ന് ബാലചന്ദ്ര മേനോൻ പറയുന്നു. അതിൽ നനഞ്ഞു കുളിച്ചു ജനം സുഖിച്ചു. അൻവർ റഷീദ് ഉൾപ്പെടെയുള്ള പ്രേമം ടീമിന് ആശംസകൾ നൽകാനും ബാലചന്ദ്ര മേനോൻ മറന്നില്ല.
നാലായിരത്തിലധികം ആളുകളാണ് ബാലചന്ദ്ര മേനോന്റെ പോസ്‌ററ് ലൈക്് ചെയ്തിരിക്കുന്നത്. നിരവധി ഷെയറുകളും പോസ്റ്റിന് ലഭിച്ചു.

പോസ്റ്റിന്റെ മുഴുവൻ രൂപം
അങ്ങിനെ ഞാനും പ്രേമം കണ്ടു …
തുടക്കം മുതലേ ഈ ചിത്രം എന്റെ ശ്രദ്ധ പിടിച്ചുപറ്റി. എക്കാലത്തെയും അതിശയിപ്പിക്കുന്ന വിജയം കരസ്ഥമാക്കിയ ഈ ചിത്രം പ്രേക്ഷകരിൽ സമ്മിശ്ര പ്രതികരണം ഉണ്ടാക്കിയതാണ് ഞാൻ ശ്രദ്ധിക്കാൻ കാരണം. ആ പ്രതികരണങ്ങളിൽ ചിലത് ഇങ്ങനെ….

1) ഇപ്പറയുന്ന പോലെ ഒന്നും ഇല്ല…..

2) ആദ്യപകുതി വല്ലാതെ ബോറടിച്ചു….

3) ക്യാമറ അങ്ങോട്ടും ഇങ്ങോട്ടും മാറി മാറി വീശി കണ്ണിനു ഈഷലായി…

4) പടം കണ്ടിറങ്ങിയാൽ പിന്നെ ഒന്നും മനസ്സിൽ നിൽക്കില്ല…

5) കാണാൻ പോയാൽ നിങ്ങൾ ഇന്റർവെല്ലിനു മുൻപ് ഇറങ്ങിപ്പോരും..തീർച്ച…

6) എന്താണ് ഈ പടം ഇങ്ങനെ ഓടുന്നതെന്ന് മനസ്സിലാകുന്നില്ല…..

7) തുടങ്ങിയാൽ തീരും വരെ കള്ളുകുടിയും സിഗരട്ട് വലിയും ….

അങ്ങനെ ഒടുവിൽ ഇന്നലെ ഞാൻ പ്രേമം കണ്ടു…. എന്റെ തോന്നലുകൾ താഴെ…

1) ഇഷ്ട്ടപ്പെടാം…ഇഷ്ട്ടപ്പെടാതിരിക്കാം. ഈ ചിത്രം ഉടനീളം ഒരു പുതുമണം ഉണ്ട് …..

2) കണ്ടു മടുത്ത പതിവ് മുഖങ്ങൾ ഈ ചിത്രത്തിൽ ഇല്ല….

3) പടം കാണാൻ വന്നിരിക്കുന്ന പ്രേക്ഷകനെ അവനാഗ്രഹിക്കുന്ന തലങ്ങളിലേക്ക് കൊണ്ടെത്തിക്കാനുള്ള ചെപ്പിടി വിദ്യകൾ സംവിധായകാൻ നന്നായി പ്രയോഗിച്ചിരിക്കുന്നു….

4) നിങ്ങൾ പരസ്യമായോ രഹസ്യമായോ ഒരു കാമുകനാണെങ്കിൽ നിങ്ങൾ ആ ‘വട്ടു ദിനങ്ങൾ’ ‘മേരി’ യിലൂടെ ഓർത്തു രസിക്കും…. അപ്പോൾ നിങ്ങൾ ആലുവാപ്പുഴയുടെ തീരത്ത് എന്ന പാട്ട് മൂളും….

5) പഠിപ്പിക്കുന്ന ടീച്ചറെ നായകൻ പ്രേമിക്കുന്നത് ഭരതന്റെ ‘ചാമര’ ത്തിലാണ് ആദ്യം കണ്ടതായി ഓർമ്മ. ഏതായാലും വിലക്കപ്പെട്ട കനി കഴിക്കാനുള്ള നിങ്ങളുടെ വാസനയെ ‘മലർ’ എന്ന കൂട്ടുകാരി നിങ്ങൾക്കായി പങ്കു വെയ്ക്കും… നെഞ്ചുപൊട്ടി നിങ്ങൾക്ക് പാടാനായി ‘ മലരേ ‘ എന്ന പാട്ടുമുണ്ട് …

6) പഠിച്ചിരുന്ന കാലത്തെ ‘ഊച്ചാളി’ രംഗങ്ങൾ നിവിൻ പോളി നിങ്ങളെ ഓർമ്മിപ്പിക്കും നിങ്ങളും അറിയാതെ പഴയ കോളേജ് ദിനങ്ങൾ ഒന്നയവിറക്കും…..ഒള്ളത് പറയട്ടെ. താടിയും മീശയും നിവിന് നന്നായി ചേരുന്നുണ്ട്… ഇഷ്ട്ടൻ നന്നായി ‘പൂന്തുവിളയാടി’യിട്ടുമുണ്ട് ..

7) ഏതു സത്യപുണ്യാളനും നടക്കാതെ പോയ ഒരു പ്രേമം ഉണ്ടാകും. അവൻ ദിവസവും സ്വയം ഉള്ളിൽ വിലപിക്കുന്നുമുണ്ടാവും. ആ ബഹുഭൂരിപക്ഷം ‘അവൾ വേണ്ട്ര ..ഇവൾ വേണ്ട്ര ‘ ‘കാണുന്നവളുമാരോന്നും വേണ്ട്ര’ എന്ന പാട്ടും പാടി സമാധാനിച്ചോളും..

8) പറയാതെ വയ്യ ….. അസഭ്യമോ അറയ്ക്കുന്ന ദ്വയാർത്ഥ പ്രയോഗങ്ങളോ ഇല്ല…. അത് തന്നെ വലിയ ആശ്വാസം! എടുത്താൽ പൊങ്ങാത്ത വിഗ്ഗൊ , കടുപ്പമുള്ള മേക്കപ്പോ , ‘എങ്ങനുണ്ടഡാ എന്റെ ഗ്ലാമർ’ എന്ന മട്ടിലുള്ള വേഷവിധാനങ്ങളില്ല ., പച്ചയായ കഥാപാത്രങ്ങൾ കടത്തിണ്ണയിലും, മച്ചിൻപ്പുറത്തും, വഴി യോരങ്ങളിലിരുന്നും നാടൻ ഭാഷ പറയുന്നു, അതിന്റെ ഒരു സുഖമുണ്ട് ….

ഇതിന്റെ അർത്ഥം പ്രേമം എല്ലാം തികഞ്ഞ പടം എന്നല്ല. പലരും സമർത്ഥമായി മുൻപ് ഉപയോഗിച്ച ഫോർമുലയാണിത് .( തമിഴ് സിനിമ ഓട്ടൊഗ്രാഫ് നല്ല ഉദാഹരണം ). മനുഷ്യന്റെ ഗ്രുഹാതുരത്വം നിറഞ്ഞ വരണ്ട ഭൂമിയിൽ പ്രേമം ഒരു നല്ല പുഷ്പ വൃഷ്ട്ടി നടത്തി… അതിൽ നനഞ്ഞു കുളിച്ചു ജനം സുഖിച്ച … രാമായണവും ഗീതയും ബൈബിളുമൊക്കെ നാം സുഖിക്കുന്നത് അതേ രീതിയിലാണ് ….
നിർമ്മാതാവ് അൻവർ റഷീദ് കാശ് തൂത്തു വാരി …നന്നായിരിക്കട്ടെ…..

‘പറയുന്നപോലൊന്നും ഇല്ല’, ‘ഒന്നും മനസ്സിൽ തങ്ങി നിൽക്കുന്നില്ല’, ‘കണ്ടിരിക്കാം’ തുടങ്ങിയ പ്രയോഗങ്ങൾ സൗകര്യപൂർവം മറക്കുക ..

ചിത്രത്തിൻറെ ശില്പ്പികളെ ഞാൻ അഭിനന്ദിക്കുന്നു …കാരണം ഇംഗ്ലീഷിൽ ഒരു പ്രയോഗം ഉണ്ട് …

NOTHING SUCCEEDS LIKE SUCCESS…..

Thats ALL Your Honour !