കെ.ജി ജോര്ജിന് ജെ.സി ഡാനിയല് പുരസ്കാരം
തിരുവനന്തപുരം: ചലച്ചിത്ര രംഗത്തെ സമഗ്രസംഭാവനയ്ക്കുള്ള 2015ലെ ജെ.സി.ഡാനിയല് പുരസ്കാരം സംവിധായകന് കെ.ജി.ജോര്ജിന്. ജോര്ജ് കരിയറില് 19 സിനിമകള് സംവിധാനം ചെയ്തിട്ടുണ്ട്. ഒക്ടോബര് 15നാണ് പുരസ്കാരം സമ്മാനിക്കുക. പൂന ഫിലിം ആന്റ് ടെലിവിഷന് ഇന്സ്റ്റിറ്റ്യൂട്ടില് നിന്ന് ഗോള്ഡ് മെഡലോടെ സംവിധായത്തില് പോസ്റ്റ് ഗ്രാജ്വേറ്റ് ഡിപ്ലോമ പാസായ അദ്ദേഹം ജോണ് എബ്രഹാം ഉള്പ്പെടെയുള്ള ചില സുഹൃത്തുക്കളായ സംവിധായകരുടെ സിനിമകളില് സഹസംവിധായകനായി പ്രവര്ത്തിച്ചിട്ടുണ്ട്. 1975ല് പുറത്തുവന്ന ‘സ്വപ്നാടന’മാണ് ആദ്യചിത്രം. ആ വര്ഷത്തെ മികച്ച സിനിമയ്ക്കുള്ള സംസ്ഥാനപുരസ്കാരം ‘സ്വപ്നാടന’ത്തിനായിരുന്നു.
പിന്നീട് ‘വ്യാമോഹം’, രാപ്പാടികളുടെ ഗാഥ’, ‘ഓണപ്പുടവ’ തുടങ്ങി ചില ചിത്രങ്ങള് അദ്ദേഹം സംവിധാനം ചെയ്തെങ്കിലും 1980ല് പുറത്തുവന്ന ‘മേള’യാണ് ശ്രദ്ധിക്കപ്പെട്ടത്. രണ്ട് വര്ഷങ്ങള്ക്ക് ശേഷം 1982ലാണ് അദ്ദേഹത്തിന്റെ മാസ്റ്റര്പീസായ ‘യവനിക’ പുറത്തുവരുന്നത്. അക്കൊല്ലത്തെ മികച്ച കഥയ്ക്കും സിനിമയ്ക്കുമുള്ള പുരസ്കാരം ‘യവനിക’യ്ക്കായിരുന്നു.
‘ലേഖയുടെ മരണം ഒരു ഫ്ളാഷ്ബാക്ക്’ (1983), ‘ആദാമിന്റെ വാരിയെല്ല്’ (1983), ‘പഞ്ചവടിപ്പാലം’ (1984), ‘ഇരകള്’ (1986), തുടങ്ങി കരിയറിലെ ഏറ്റവും മികച്ച ചിത്രങ്ങള് അദ്ദേഹം പ്രദര്ശനത്തിനെത്തിച്ചു. മമ്മൂട്ടിയെ നായകനാക്കി 1998ല് പുറത്തുവന്ന ‘ഇലവംകോട് ദേശ’ത്തിന് ശേഷം അദ്ദേഹം സിനിമകളൊന്നും ചെയ്തിട്ടില്ല.
