റെയിന് ഇന്റര്നാഷണല് നേച്ചര് ഫിലിം ഫെസ്റ്റിവലിന് മൂന്നാറില് തുടക്കമായി
ഇടുക്കി: റെയിന് ഇന്റര്നാഷണല് നേച്ചര് ഫിലിം ഫെസ്റ്റിവലിന് മൂന്നാറില് തുടക്കമായി. പ്രകൃതി സംരക്ഷണ സന്ദേശവുമായി നടത്തുന്ന രാജ്യത്തെ ആദ്യ നേച്ചര് ഫിലിം ഫെസ്റ്റിവലാണ് ഇത്. ഭാരതത്തിന്റെ ഫോറസ്റ്റ്മാനെന്ന് അറിയപ്പെടുന്ന ജാദവ് മൊലായ് പയാങ്ങ് ചലച്ചിത്രോത്സവം ഉദ്ഘാടനം ചെയ്തു. സംവിധായകന് ജയരാജിന്റെ നേതൃത്വത്തിലുള്ള ജയരാജ് ഫൗണ്ടേഷന് കീഴില് പ്രവര്ത്തിക്കുന്ന ബേര്ഡ്സ് ക്ലബ്ബ് ഇന്റര്നാഷണലാണ് ഫെസ്റ്റിവല് സംഘടിപ്പിച്ചിരിക്കുന്നത്.
തിരക്കഥാകൃത്തും ചലച്ചിത്രതാരവുമായ രഞ്ജിപണിക്കര് മുഖ്യാതിഥിയായിരുന്നു. അമേരിക്കന് സംവിധായകന് റയാന് പാട്രിക്ക് കില്ലേക്കി, ജാപ്പനീസ് സംവിധായകന് ഇമാസു ഹിദേകുനി ശ്രീലങ്കന് സംവിധായകന് പ്രസന്ന വിത്തനാഗെ കെ വി മോഹന് കുമാര് ഐഎഎസ് ജൂറി ചെയര്മാനും കന്നട സംവിധായകനുമായ ഗിരീഷ് കാസറവള്ളി, നടിയും സംവിധായകയുമായ ബിജയ ജന തുടങ്ങിയവര് ചടങ്ങില് പങ്കെടുത്തു.
റയാന് പാട്രിക്ക് കില്ലേക്കിയുടെ യാസുനി മാന് എന്ന ഡോക്യുമെന്ററിയായിരുന്നു ഉദ്ഘാടന ചിത്രം. ഡോക്യുമെന്ററി, ഫീച്ചര്, ഷോര്ട്ട് ഫിക്ഷന് വിഭാഗങ്ങളിലായി രാജ്യത്തിനകത്തും പുറത്തുനിന്നുമുള്ള ഇരുപതോളം ചിത്രങ്ങളും കുട്ടികളുടെ വിഭാഗങ്ങളിലായി അമ്പതോളം ചിത്രങ്ങളും മൂന്നു ദിവസത്തെ ഫെസ്റ്റിവലില് പ്രദര്ശിപ്പിക്കും. കന്നട സംവിധായകന് ഗിരീഷ് കാസറവള്ളി, ശ്രീലങ്കന് സംവിധായകന് പ്രസന്ന വിത്തനാഗെ എന്നിവര് നേതൃത്വം നല്കുന്ന ജൂറിയാണ് വിജയികളെ കണ്ടെത്തുക.
