നാലാമതും തോറ്റ് ചെന്നൈ സൂപ്പർ കിം​ഗ്സ്; ആദ്യ ജയം നേടി ഹൈദരാബാദ്

ഐപിഎൽ 2022 ലെ ആദ്യ ജയത്തിനായി ചെന്നൈ സൂപ്പർ കിം​ഗ്സിന് ഇനിയും കാത്തിരിക്കണം. ഇതുവരെ ജയിക്കാത്ത ടീമുകളുടെ മത്സരത്തിൽ ഹൈദരാബാദ് എട്ടു വിക്കറ്റിന് ചെന്നൈ സൂപ്പർ കിം​ഗ്സിനെ തോൽപ്പിച്ചു. 155 റൺസ് പിൻതുടർന്ന സൺറൈസേഴ്സ് 17.4 ഓവറിൽ ലക്ഷ്യം കണ്ടു. 50 പന്തിൽ 75 റൺസെടുത്ത ഓപ്പണർ അഭിഷേക് ശർമ്മയാണ് കളിയിലെ താരം. 

ടോസ് നഷ്ടപ്പെട്ട് ബാറ്റിം​ഗിനിറങ്ങിയ ചെന്നൈക്ക് പവർപ്ലേ ഓവറുകളിൽ തന്നെ ഓപ്പണർമാരെ നഷ്ടമായി. ഉത്തപ്പ 15 റൺസും ​ഗെയ്ക്വാദ് 16 റൺസും നേടി പുറത്തായി. എന്നാൽ മൂന്നാമനായി എത്തിയ മോയിൻ അലിയുടെ ബാറ്റിം​ഗ് മികവാണ് ചെന്നൈക്ക് ഭേദപ്പെട്ട സ്കോർ സമ്മാനിച്ചത്. അലി 35 പന്തിൽ 48 റൺസ് നേടി. 27 റൺസെടുത്ത അമ്പാട്ടി റായി‍ഡു, 23 റൺസെടുത്ത രവീന്ദ്ര ജഡേജ എന്നിവരും 154ൽ എത്താൻ ചെന്നൈയെ സഹായിച്ചു. നടരാജനും വാഷിം​ഗ്ടൺ സുന്ദറും 2 വിക്കറ്റ് വീതം വീഴ്ത്തി. 

ഓപ്പണർമാരായ അഭിഷേക് ശർമ്മയും കെയിൻ വില്യംസണും വളരെ കരുതലോടെയാണ് ഹൈദരാബാദിന് വേണ്ടി തുടങ്ങിയത്. ആദ്യ വിക്കറ്റിൽ ഇരുവരും 89 റൺസ് കൂട്ടിച്ചേർത്തു. 40 പന്തിൽ 32 റൺസെടുത്ത് വില്യംസൺ പുറത്തായി എങ്കിലും പിന്നീടെത്തിയ രാഹുൽ തൃപതി വേ​ഗത്തിൽ ബാറ്റുവീശി. 15 പന്തിൽ 39 റൺസാണ് തൃപതി നേടിയത്. അ‍ഞ്ച് ഫോറും 2 സിക്സും ഉൾപ്പെട്ടതായിരുന്നു ആ ഇന്നിം​ഗ്സ്. 75 റൺസെടുത്ത് പുറത്തായ അഭിഷേകിന്റെ ഇന്നിം​ഗ്സിൽ അഞ്ച് ബൗണ്ടറിയും 3 സിക്സും ഉണ്ടായിരുന്നു.