ഇപിഎൽ: കിരീടപ്പോരാട്ടത്തിൽ ലിവർപൂളിന് തിരിച്ചടി; ടോട്ടനവുമായി സമനില. മാഞ്ചസ്റ്റർ യുണൈറ്റഡിന് കനത്ത തോൽവി

യുണൈറ്റഡിനെ ബ്രൈറ്റൺ എതിരില്ലാത്ത നാല് ​ഗോളിന് തകർത്തു. അവസാന നിമിഷ ​ഗോളിൽ സമനില വഴങ്ങി ചെൽസി.
 | 
LIVERPOOL

ഇം​ഗ്ലീഷ് പ്രീമിയർ കിരീടപ്പോരാട്ടത്തിൽ ലിവർപൂളിന് കനത്ത തിരിച്ചടി. അന്റോണിയോ കോണ്ടെയുടെ ടോട്ടനവുമായി നടന്ന മത്സരം ഒരു ​ഗോൾ സമനിലയിൽ പിരിഞ്ഞതോടെ സിറ്റിക്ക് മൂന്ന് പോയിന്റ് ലീഡ് നേടാനുള്ള അവസരമാണ് വന്നിരിക്കുന്നത്. സൺ ഹ്യൂങ് മിൻ നേടിയ ​ഗോളിൽ രണ്ടാം 56ാം മിനിറ്റിൽ ലീഡ് എടുത്ത ടോട്ടനത്തിനെ 74ാം മിനിറ്റിൽ ലൂയിസ് ഡിയാസ് നേടിയ ​ഗോളിലൂടെ ലിവർപൂൾ സമനിലയിൽ പിടിച്ചു. ഇന്ന് നടക്കുന്ന മത്സരത്തിൽ മാഞ്ചസ്റ്റർ സിറ്റിക്ക് ന്യൂകാസിൽ യുണൈറ്റഡിനെ തോൽപ്പിക്കാനായാൽ ലീഡ് മൂന്നു പോയിന്റായി ഉയർത്താം.

35 മത്സരങ്ങൾ കഴിഞ്ഞപ്പോൾ ലിവർപൂളിനും 34 മത്സരങ്ങൾ കളിച്ച സിറ്റിക്കും 83 പോയിന്റാണ് ഉള്ളത്. ​ഗോൾ ശരാശരിയിൽ ലിവർപൂൾ ഒരു ​ഗോളിന് മുന്നിലാണ്. സിറ്റി തോറ്റുകൊണ്ട് ലിവർപൂളിന് കിരീടം കിട്ടാനുള്ള സാധ്യത താൻ കാണുന്നില്ലെന്ന് ലിവർപൂൾ കോച്ച് യുർ​ഗാൻ ക്ലോപ്പ് പറഞ്ഞു. 

മറ്റൊരു മത്സരത്തിൽ ബ്രൈറ്റൺ  മാഞ്ചസ്റ്റർ യുണൈറ്റഡിനെ എതിരില്ലാത്ത നാല് ​ഗോളുകൾക്ക് തകർത്തുവിട്ടു. മോയ്സസ് കയ്സീഡോ, മാർക്ക് കുക്കുറല്ല, പാസ്ക്കൽ ​ഗ്രോബ് ലിയനാർഡോ ട്രൊസാർഡ് എന്നിവരാണ് ​ഗോളടിച്ചത്. ക്രിസ്റ്റ്യാനോ റൊണാൾഡോ ഉൾപ്പടെയുള്ള മുന്നേറ്റ നിരയുണ്ടായിട്ടും മാഞ്ചസ്റ്റർ യുണൈറ്റഡ് പരാജയപ്പെട്ടു.

സൗത്താംപ്റ്റണെ എതിരില്ലാത്ത മൂന്ന് ​ഗോളിന് പരാജയപ്പെടുത്തി ബ്രെന്റ്ഫോർഡ് വിലപ്പെട്ട മൂന്ന് പോയിന്റ് സ്വന്തമാക്കി.  റൊമേലോ ലുക്കാക്കു നേടിയ ഇരട്ട ​ഗോളിൽ മുന്നിട്ടു നിന്ന ചെൽസിയെ 79, 97 മിനിറ്റുകളിൽ നേടിയ ​ഗോളിലൂടെ വൂൾവ്സ് സമനിലയിൽ പിടിച്ചു. ഫ്രാൻസിസ്കോ ട്രിയാൻകോ, കൊണോർ കോഡി എന്നിവരാണ് ​ഗോളുകൾ നേടിയത്. 

ബേൺലിയെ ഒന്നിനെതിരെ മൂന്ന് ​ഗോളുകൾക്ക് ആസ്റ്റൺ വില്ല തോൽപ്പിച്ചു. ക്രിസ്റ്റൽ പാലസിനോട് എതിരില്ലാത്ത ഒരു ​ഗോളിന് തോറ്റതോടെ വാറ്റ്ഫോഡ് തരംതാഴ്ത്തപ്പെട്ടു.  എവർട്ടൺ, ലീഡ്സ്, ബേൺലി എന്നീ ടീമുകളിൽ ഒരു ടീമായിരിക്കും തരംതാഴ്ത്തലിൽ മൂന്നാം സ്ഥാനത്ത് എത്തുക. നോർവിച്ച് സിറ്റിയാണ് ആദ്യം ഇപിഎല്ലിൽ നിന്നും പുറത്തായ ടീം.