നിപ;സമ്പർക്കപ്പട്ടിക ഉയർന്നേക്കാം. തീവ്രവ്യാപന സാധ്യതയില്ലെന്ന് കേന്ദ്രസംഘം

 നിപ ബാധിച്ച് മരിച്ച കുട്ടിയുടെ സമ്പർക്കപ്പട്ടികയിൽ കൂടുതൽ പേർ വന്നേക്കാമെന്ന് ആരോ​ഗ്യമന്ത്രി അറിയിച്ചു. ഏഴുപേരുടെ സാമ്പിൾ  പുനെ വൈറോളജി ഇൻസ്റ്റിറ്റ്യൂട്ടിലേക്ക് അയച്ചതായി മന്ത്രി പറഞ്ഞു. നിലവിൽ ഹൈറിസ്ക് വിഭാ​ഗത്തിൽ പെടുത്തിയ 20പേർ ഉൾപ്പെടെ 188പേരാണ് സമ്പർക്കപ്പട്ടികയിലുള്ളത്. ഈ പട്ടികയാണ് ഉയരാൻ സാധ്യതയുള്ളത് . കൂടുതൽ പേരെ കണ്ടെത്താനുള്ള നടപടികൾ തുടങ്ങി.  രോ​ഗ ഉറവിടം കണ്ടെത്താനുള്ള ശ്രമവും ഊർജിതമായി നടക്കുകയാണ് . മരിച്ച കുട്ടിയുടെ വീട്ടിലെ ആട് രണ്ട് മാസം മുമ്പ് ചത്ത സംഭവത്തിന് നിപയുമായി ബന്ധമില്ലെന്നും മന്ത്രി പറഞ്ഞു.

മരിച്ച കുട്ടിയുടെ അമ്മയും രണ്ട് ആരോ​ഗ്യ പ്രവർത്തകരും ചികിൽസയിലാണെങ്കിലും ഇവരുടെ നില ​ഗുരുതരമല്ല. കോഴിക്കോട് മെഡിക്കൽ കോളജ് ആശുപത്രിയിൽ വൈറോളജി ലാബ് സജ്ജീകരിക്കുകയാണ്. ഇതിനായി പുനെ വൈറോളജി ഇൻസ്റ്റിറ്റ്യൂട്ടും സഹായിക്കും. ആരോ​ഗ്യ പ്രവർത്തകർക്ക് നിപ ചികിത്സക്കുള്ള പരിശീലനം ഇന്ന് മുതൽ തുടങ്ങും. നിപ ചികിത്സ മെഡിക്കൽ കോളജ് ആശുപത്രിയുടെ മറ്റ് ചികിൽസകളെ ബാധിക്കില്ലെന്നും ആരോ​ഗ്യമന്ത്രി പറഞ്ഞു.

അതേസമയം  നിപ വ്യാപനം തീവ്രമാകാനിടയില്ലെന്നാണ് കേന്ദ്ര സംഘത്തിൻ്റെ ആദ്യ നിഗമനം. കൊവിഡ് പ്രോട്ടോകോൾ പാലിക്കുന്നതിനാൽ രോഗനിയന്ത്രണം സാധ്യമാണ്. ആവശ്യമെങ്കിൽ കൂടുതൽ വിദഗ്ധർ കേരളത്തിലെത്തും. ഏരിയൽ ബാറ്റ് സർവേയ്ക്കും കേന്ദ്രം നിർദ്ദേശം നൽകി.