തൊഴിലില്ലായ്മ ഏറ്റവും ഉയര്ന്ന നിരക്കില്‍; ദേശീയ സാമ്പിള് സര്വേ റിപ്പോര്ട്ട് പൂഴ്ത്താന്‍ കാരണം ഇത്
ന്യൂഡല്‍ഹി: രാജ്യത്ത് തൊഴിലില്ലായ്മാ നിരക്ക് ഏറ്റവും ഉയര്ന്ന നിരക്കിലെന്ന് ദേശീയ സാമ്പിള് സര്വേ. തൊഴിലില്ലായ്മ 45 വര്ഷത്തിനിടയിലെ ഏറ്റവും ഉയര്ന്ന നിലയി ലാണെന്നാണ് ദേശീയ സാമ്പിള് സര്വ്വേ ഓഫീസിന്റെ പിരിയോഡിക് ലേബര് ഫോഴ്സ് സര്വ്വേ റിപ്പോര്ട്ട് പറയുന്നത്. 2017-18 വര്ഷത്തില് തൊഴിലില്ലായ്മാ നിരക്ക് 6.1 ശതമാനമായി വര്ദ്ധിച്ചുവെന്ന് റിപ്പോര്ട്ട് വ്യക്തമാക്കുന്നു.
ഈ റിപ്പോര്ട്ട് കേന്ദ്രസര്‍ക്കാര്‍ പുറത്തു വിടാത്തതില്‍ പ്രതിഷേധിച്ച് നാഷണല്‍ സ്റ്റാറ്റിസ്റ്റിക്‌സ് കമ്മീഷന്‍ ആക്ടിംഗ് ചെയര്‍പേഴ്‌സണ്‍ ഉള്‍പ്പെടെ രണ്ട് സര്‍ക്കാരിതര അംഗങ്ങള്‍ രാജിവെച്ചിരുന്നു. തെരഞ്ഞെടുപ്പ് അടുക്കുന്നതിനാല്‍ കേന്ദ്രസര്‍ക്കാര്‍ ഈ റിപ്പോര്ട്ട് പൂഴ്ത്തി വെച്ചിരിക്കുകയാണെന്നാണ് ഇവര്‍ വ്യക്തമാക്കിയത്.
2016ല്‍ നോട്ടുനിരോധനം പ്രഖ്യാപിച്ചതിനു ശേഷം നടത്തിയ ആദ്യ സര്‍വേയുടെ ഫലമാണ് കേന്ദ്രസര്‍ക്കാര്‍ മുക്കിയത്. 2017ജൂലൈക്കും 2018 ജൂണിനുമിടയിലെ തൊഴില്‍ ലഭ്യതയും നഷ്ടവും സംബന്ധിച്ചുളള റിപ്പോര്‍ട്ടാണ് ഇത്. 1972-73 വര്‍ഷത്തിനു ശേഷമുണ്ടാകുന്ന ഏറ്റവും ഉയര്ന്ന തൊഴിലില്ലായ്മാ നിരക്കാണ് ഇപ്പോള്‍ രേഖപ്പെടുത്തിയിട്ടുള്ളതെന്ന് റിപ്പോര്ട്ട് വ്യക്തമാക്കുന്നു.
2011-12 വര്ഷത്തില് രണ്ടാം യു.പി.എ സര്‍ക്കാരിന്റെ ഭരണകാലത്ത് ഇത് വെറും 2.2 ശതമാനം മാത്രമായിരുന്നു. യുവാക്കള്‍ക്കിടയില്‍ തൊഴിലില്ലായ്മ വര്‍ദ്ധിച്ചു. ഗ്രാമീണ മേഖലയില്‍ 15നും 29നും ഇടയില്‍ പ്രായമുള്ളവര്‍ക്കിടയില്‍ തൊഴിലില്ലായ്മ 2011-12 വര്‍ഷത്തെ അപേക്ഷിച്ച് 5% വര്‍ധിച്ച് 17.4% ആയി ഉയര്‍ന്നു. ഗ്രാമീണ മേഖലയില്‍ സ്ത്രീകളുടെ കാര്യത്തില്‍ 4.8% വര്‍ധിച്ച് 13.6% ആയി ഉയര്‍ന്നെന്നും സര്വ്വേ വ്യക്തമാക്കുന്നു.
