യുഎസില് മൂന്നു പലസ്തീന് വിദ്യാര്ത്ഥികള്ക്ക് നേരെ വെടിവെയ്പ്പ് ; ഒരാളുടെ നില ഗുരുതരം
അമേരിക്കയില് മൂന്നു പലസ്തീന് വിദ്യാര്ത്ഥികള്ക്ക് നേരെ വെടിവെയ്പ്പ്. വെർമോണ്ടിലെ യൂണിവേഴ്സിറ്റി ക്യാമ്പസിന് സമീപമാണ് സംഭവം. റോഡ് ഐലന്റിലെ ബ്രൗണ് യൂണിവേഴ്സിറ്റി വിദ്യാര്ത്ഥി ഹിഷാം അവര്താനി, പെന്സില്വാനിയ ഹാവര്ഫോര്ഡ് കോളേജ് വിദ്യാര്ത്ഥി കിന്നന് അബ്ദേല്, കണക്ടികട്ട് ട്രിനിറ്റി കോളേജ് വിദ്യാര്ത്ഥി തഹ്സീന് അഹമ്മദ് എന്നിവർക്കാണ് വെടിയേറ്റത്. വെടിയുതിർത്ത അക്രമി ഓടി രക്ഷപ്പെട്ടു. സംഭവത്തിൽ, വിദ്വേഷ കൊലപാതകത്തിൻ്റെ പേരിൽ പൊലീസ് കേസെടുത്ത് അന്വേഷണം ആരംഭിച്ചു.
വിദ്യാർത്ഥികൾ തെരുവിലൂടെ നടക്കുമ്പോൾ അക്രമി വെടിയുതിർക്കുകയായിരുന്നു. ഒരു വിദ്യാർത്ഥിയുടെ നട്ടെല്ലിനാണ് വെടിയേറ്റത്. രണ്ടു വിദ്യാർത്ഥികൾ അമേരിക്കൻ പൗരത്വമുള്ളവരാണ്. മൂന്നാമത്തെ ആൾ നിയമപരമായ താമസക്കാരനാണ്. വെടിയേറ്റ മൂന്നുപേരിൽ രണ്ട് പേരുടെ നില തൃപ്തികരമാണ്. നട്ടെല്ലിനു വെടിയേറ്റ വിദ്യാർത്ഥിയുടെ ആരോഗ്യത്തിലാണ് ആശങ്ക. ഒരാളുടെ ബന്ധുവിൻ്റെ വീട്ടിൽ ഇന്ന് താങ്ക്സ് ഗിവിങ് ഡിന്നർ കഴിച്ചതിനു ശേഷം മടങ്ങുമ്പോഴായിരുന്നു ആക്രമണം. അക്രമി പിസ്റ്റളിൽ നിന്ന് നാല് തവണയെങ്കിലും വെടിയുതിർത്തു എന്നാണ് റിപ്പോർട്ട്.
