ബിജെപി നേതാവ് സി.കൃഷ്ണ കുമാർ പീഡിപ്പിച്ചെന്ന് യുവതിയുടെ പരാതി
ബിജെപി വൈസ് പ്രസിഡന്റ് സി.കൃഷ്ണകുമാറിന് എതിരെ പീഡന പരാതി. ബിജെപി സംസ്ഥാന അധ്യക്ഷന് രാജീവ് ചന്ദ്രശേഖറിനാണ് പാലക്കാട് സ്വദേശിനി പരാതി നല്കിയത്. സി.കൃഷ്ണകുമാറിന്റെ അടുത്ത ബന്ധു കൂടിയായ യുവതി ഇന്നലെയാണ് രാജീവ് ചന്ദ്രശേഖറിനു പരാതി ഇ മെയിലില് അയച്ചത്. അതേസമയം, കുടുംബത്തിലെ സ്വത്തു തര്ക്കത്തിന്റെ ഭാഗമാണു പരാതി എന്നാണ് സി.കൃഷ്ണകുമാറിന്റെ പ്രതികരണം.
വര്ഷങ്ങള്ക്കു മുന്പ് കൃഷ്ണകുമാര് തന്നെ പീഡിപ്പിച്ചുവെന്നാണ് യുവതി പരാതിയില് പറയുന്നത്. പരാതി ലഭിച്ചുവെന്നും നടപടി സ്വീകരിക്കുമെന്നും രാജീവ് ചന്ദ്രശേഖറിന്റെ ഓഫിസ് പരാതിക്കാരിയെ അറിയിച്ചിട്ടുണ്ട്. ബിജെപി ഭാരവാഹിത്വത്തില് തുടരാന് കൃഷ്ണകുമാറിന് യാതൊരു അര്ഹതയുമില്ലെന്ന് പരാതിയില് പറയുന്നു. ഏറെ നാളുകളായി മനസ്സില് പേറുന്ന ദുഃഖം താങ്കളുടെ ശ്രദ്ധയില്പ്പെടുത്താനാണ് കത്തെഴുതുന്നതെന്നും കൃഷ്ണകുമാറിന് എതിരെ നടപടി സ്വീകരിക്കണമെന്നും യുവതി ചൂണ്ടിക്കാട്ടുന്നു. പിതാവിന്റെ ചികിത്സാര്ഥം രാജീവ് ചന്ദ്രശേഖര് ബെംഗളൂരുവില് ആണെന്നും തിരിച്ചെത്തിക്കഴിഞ്ഞു തുടര്നടപടി സ്വീകരിക്കുമെന്നുമാണ് ഓഫിസ് മറുപടി നല്കിയിരിക്കുന്നത്.
∙ പരാതിയില് പറയുന്നത്:
'കുറച്ചു നാളുകള്ക്കു മുന്പ് കൃഷ്ണകുമാര് ലൈംഗികമായി പീഡിപ്പിച്ചു. സംഭവം വല്ലാത്ത ഞെട്ടലാണുണ്ടാക്കിയത്. ബിജെപിയിലെ മുതിര്ന്ന നേതാക്കളോടു പരാതിപ്പെട്ടു. എളമക്കരയില് ആര്എസ്എസ് കാര്യാലയത്തില് പോയി ഗോപാലന്കുട്ടി മാസ്റ്ററെ നേരിട്ടു കണ്ടു പരാതി അറിയിച്ചു. വി.മുരളീധരന്, എം.ടി.രമേശ്, അന്നത്തെ സംഘടനാ ചുമതലയുള്ള ദേശീയ ജനറല് സെക്രട്ടറി സുഭാഷ് എന്നിവരെയും കണ്ടിരുന്നു. കൃഷ്ണകുമാറിനെതിരെ കടുത്ത നടപടി ഉണ്ടാകുമെന്നും നീതി ലഭിക്കുമെന്നും അവര് ഉറപ്പു നല്കി. എന്നാല് എന്റെ പരാതി അവഗണിച്ച് ഒറ്റപ്പെടുത്തുന്ന ദൗര്ഭാഗ്യകരമായ നടപടിയാണ് ഉണ്ടായത്.
