എവർട്ടണോട് തോറ്റ് മാഞ്ചസ്റ്റർ യുണൈറ്റഡ്; സൗത്താംപ്റ്റണെതിരെ ഗോളടിച്ചു കൂട്ടി ചെൽസി
പ്രീമിയർ ലീഗിൽ നിന്നും തരംതാഴ്ത്തൽ ഭീഷണി നേരിടുന്ന എവർട്ടണു മുന്നിൽ വീണ് മാഞ്ചസ്റ്റർ യുണൈറ്റഡ്. എതിരില്ലാത്ത ഒരു ഗോളിനാണ് യുണൈറ്റഡ് ഗുഡിസൺ പാർക്കിൽ തോറ്റത്. 27ാം മിനിറ്റിൽ ആന്റണി ഗോൾഡൻ നേടിയ ഗോളാണ് വിലപ്പെട്ട മൂന്ന് പോയിന്റ് അവർക്ക് സ്വന്തമാക്കി കൊടുത്തത്. ഇതോടെ 18ാം സ്ഥാനത്തുള്ള ബേൺലിയേക്കാൾ 4 പോയിന്റ് ലീഡ് നേടാൻ 17ാം സ്ഥാനത്തുള്ള എവർട്ടണ് സാധിച്ചു.
കഴിഞ്ഞ രണ്ടു മത്സരങ്ങളിൽ കനത്ത തോൽവി ഏറ്റുവാങ്ങിയ ചെൽസി അതിന്റെ ക്ഷീണം സൗത്താംപ്റ്റണെതിരെ തീർത്തു. എതിരില്ലാത്ത ആറു ഗോളുകൾക്കാണ് ചെൽസി സൗത്താംപ്റ്റണെ തകർത്തത്. 2 ഗോൾ വീതം നേടിയ മാസൺ മൗണ്ട്, തിമോ വെർണ്ണർ എന്നിവരും ഓരോ ഗോൾ നേടിയ മാർക്കോ അലോൺസോ, കയി ഹാവേട്സ് എന്നിവരുമാണ് ചെൽസിക്കായി സ്കോർ ചെയ്തത്.
അവസാന ലീഗ് മത്സരത്തിൽ 4-1ന് ബ്രെന്റ്ഫോഡിനോടും ചാമ്പ്യൻസ് ലീഗ് മത്സരത്തിൽ 3-1 റയൽ മാഡ്രിഡിനോടും തോറ്റതിന്റെ ക്ഷീണത്തിലായിരുന്നു ചെൽസി. അതിനാൽ തന്നെ ഈ വിജയം ടീമിന് വലിയ ആത്മവിശ്വാസമാണ് നൽകുക.
പോയിന്റ് പട്ടികയിൽ നാലാമതെത്താനുള്ള അവസരം ആഴ്സണൽ ഇന്ന് കളഞ്ഞു കുളിച്ചു. ബ്രൈറ്റനുമായുള്ള മത്സരത്തിൽ ഒന്നിനെതിരെ രണ്ട് ഗോളിനാണ് അവർ തോറ്റത്. വാറ്റ്ഫോഡിനെ എതിരില്ലാത്ത മൂന്ന് ഗോളിന് തകർത്ത് ലീഡ്സ് വിലപ്പെട്ട മൂന്ന് പോയിന്റ് സ്വന്തമാക്കി.
