റയലിനെ തോൽപ്പിച്ച് പിഎസ്ജി; അഞ്ച് ഗോൾ തിളക്കത്തിൽ സിറ്റി
![psg](https://newsmoments.in/static/c1e/client/89487/uploaded/53703ef38f4eefe94082b91aa37b8378.jpg)
ചാമ്പ്യൻസ് ലീഗ് പ്രീക്വാർട്ടറിലെ ആദ്യപാദ മത്സരത്തിൽ മാഞ്ചസ്റ്റർ സിറ്റിക്കും പിഎസ്ജിക്കും വിജയം. പാരിസിൽ നടന്ന കളിയിൽ അവസാന നിമിഷം കിലിയൻ എംബാപ്പേ നേടിയ ഗോളിൽ റയലിനെ എതിരില്ലാത്ത ഒരു ഗോളിന് പിഎസ്ജി തോൽപ്പിച്ചപ്പോൾ സിറ്റി, പോർച്ചുഗീസ് ക്ലബ് സ്പോട്ടിംഗ് ലിസ്ബണെ എതിരില്ലാത്ത അഞ്ച് ഗോളിന് തകർത്തു.
രണ്ടാം പകുതിയിൽ 94ാം മിനിറ്റിലാണ് കിലിയൻ എംബാപ്പെ ഗോൾ നേടുന്നത്. നെയ്മറിന്റെ ഒരു ബാക്ക് ഹീൽ അസിസ്റ്റിലാണ് ഗോൾ പിറന്നത്. ലയണൽ മെസി അറുപത്തിരണ്ടാം മിനിറ്റിൽ പെനാൽറ്റി പാഴാക്കിയ മത്സരത്തിൽ സമനിലയിലേക്ക് പോയെന്നുറച്ച സമയത്താണ് ഗോൾ പിറക്കുന്നത്.
ബെർണാണ്ടോ സിൽവയുടെ ഇരട്ട ഗോളും മെഹറസ്, ഫോഡൻ, സ്റ്റെർലിംഗ് എന്നിവരുടെ ഗോളുകളും സിറ്റിയുടെ ക്വാർട്ടർ സ്ഥാനം ഏറെക്കുറെ ഉറപ്പിച്ചു. 63 ശതമാനം പന്ത് കൈവശം വച്ച സിറ്റി 15 ഷോട്ടുകൾ ഗോൾ ലക്ഷ്യമാക്കി പായിച്ചപ്പോൾ സ്പോട്ടിംഗിന് വെറും 3 ഷോട്ടുകളാണ് ഉതിർക്കാനായത്. അതിൽ തന്നെ എഡേഴ്സണെ പരീക്ഷിച്ച ഒറ്റ ഷോട്ടുപോലും ഉണ്ടായില്ല.
ആദ്യ പകുതിയിൽ ആണ് നാല് ഗോളുകൾ പിറന്നത്. ഏഴാം മിനിറ്റിൽ കെവിൻ ഡിബ്രൂണയുടെ പാസിൽ റിയാദ് മെഹറസ് ഗോൾ നേടി. പതിനേഴ്, നാൽപ്പത്തിനാല് മിനിറ്റുകളിൽ സിൽവ ഗോൾനേടി. മുപ്പത്തിരണ്ടാം മിനിറ്റിലാണ് ഫോഡന്റെ ഗോൾ പിറന്നത്. രണ്ടാം പകുതിയിൽ 58ാം മിനിറ്റിൽ സ്റ്റെർലിംഗും വല കുലുക്കി.
ഇന്ന് രാത്രി ഇന്റർമിലാൻ- ലിവർപൂൾ മത്സരവും റെഡ്ബുൾ സാൽസ്ബർഗ്- ബയേൺ മ്യൂണിക്ക് മത്സരവും നടക്കും.