​​​​​​​ ബാം​ഗ്ലൂരിനെ വീഴ്ത്തി രാജസ്ഥാൻ ഒന്നാമതെത്തി

145 എന്ന വിജയലക്ഷ്യത്തെ ഫലപ്രദമായി പ്രതിരോധിച്ച രാജസ്ഥാൻ റോയൽസ് ഐപിഎൽ പോയിന്റ് പട്ടികയിൽ ഒന്നാമതെത്തി. ബാം​ഗ്ലൂരിനെതിരായ മത്സരത്തിൽ 29 റൺസിനാണ് ആർആർ വിജയിച്ചത്. ആർസിബി 19.3 ഓവറിൽ 115 റൺസിന് ഓൾഔട്ടായി.

ജോസ് ബട്ട്ലറും പടിക്കലും ഹെത്‍മെയറും തിളങ്ങാതെ പോയ മത്സരത്തിൽ 31 പന്തിൽ 56 റൺസ് നേടിയ റയാൻ പരാ​ഗാണ് 144 എന്ന സ്കോറിൽ രാജസ്ഥാനെ എത്തിച്ചത്. സ‍ഞ്ജു സാംസൺ 27 റൺസെടുത്ത് വീണ്ടും ഹസരങ്കയുടെ പന്തിൽ പുറത്തായി. 2 വിക്കറ്റ് വീതം വീഴ്ത്തിയ മുഹമ്മദ് സിറാജ്, ഹെയ്സൽവുഡ്, ഹസരങ്ക എന്നിവരാണ് രാജസ്ഥാനെ ചുരുട്ടിക്കെട്ടിയത്. 

ഓപ്പണറായി വന്ന കോഹ്‍ലി 9 റൺസ് എടുത്തു മടങ്ങിയതോടെ ബാം​ഗ്ലൂരിന്റെ തകർച്ച ആരംഭിച്ചു. 4 വിക്കറ്റ് വീഴ്ത്തിയ ഫാസ്റ്റ് ബൗളർ കുൽദീപ് സെൻ, 3 വിക്കറ്റ് നേടിയ അശ്വിൻ, 2 വിക്കറ്റെടുത്ത പ്രസിദ്ധ് കൃഷ്ണ എന്നിവർ ചേർന്ന് ആർസിബിയെ എറിഞ്ഞിട്ടു. 23 റൺസ് നേടിയ നായകൻ  ഫാഫ് ഡുപ്ലസിയാണ് ടോപ് സ്കോറർ. റയാന്‍ പരാഗ് 4 ക്യാച്ച് എടുത്തു. 

8 കളിയിൽ നിന്നും ആറ് ജയവും രണ്ട് തോൽവിയുമായി രാജസ്ഥാൻ 12 പോയിന്റോടെ ഒന്നാം സ്ഥാനത്തെത്തി. രണ്ടാം സ്ഥാനത്തുള്ള ​ഗുജറാത്തിന് 7 കളിയിൽ നിന്നും 12 പോയിന്റ് ഉണ്ട്. 10 പോയിന്റോ‌ടെ അഞ്ചാം സ്ഥാനത്താണ് ആർസിബി.