സിറ്റി, ലിവർപൂൾ, റയൽമാഡ്രിഡ്, ഇന്റർ, എസി മിലാൻ ജയിച്ചു; പിഎസ്ജി, അത്‍ലറ്റിക്കോ മാഡ്രിഡ് എന്നിവർക്ക് തോൽവി
ചാമ്പ്യൻസ് ലീഗ് അഞ്ചാം റൗണ്ട് പോരാട്ടങ്ങളിൽ ശക്തരായ പിഎസ്ജിയെ പരാജയപ്പെടുത്തി മാഞ്ചസ്റ്റർ സിറ്റി പ്രീ ക്വാർട്ടറിൽ പ്രവേശിച്ചു. ഒന്നിനെതിരെ രണ്ട് ഗോളുകൾക്കായിരുന്നു സിറ്റിയുടെ വിജയം. കിലിയൻ എംബാപ്പെ നേടിയ ഗോളിൽ അമ്പതാം മിനിറ്റിൽ പിഎസ്ജി ലീഡ് നേടിയെങ്കിലും 63,76 മിനിറ്റുകളിൽ റഹീം സ്റ്റർലിംഗും ഗബ്രിയേൽ ജിസൂസും നേടിയ ഗോളുകളിൽ സിറ്റി ജയം തിരികെ പിടിച്ചു. എ ഗ്രൂപ്പിലെ ഒന്നാം സ്ഥാനക്കാരായിട്ടാണ് സിറ്റി അവസാന 16ൽ എത്തുന്നത്. പിഎസ്ജി ആണ് ഗ്രൂപ്പിൽ രണ്ടാം സ്ഥാനത്ത്. അവരും പ്രീക്വാർട്ടർ ഉറപ്പിച്ചിട്ടുണ്ട്. ഇതേ ഗ്രൂപ്പിലെ മറ്റൊരു കളിയിൽ റെഡ്ബുൾ ലെപ്സിഗ്, ക്ലബ് ബ്രൂഗിനെ പരാജയപ്പെടുത്തി. എതിരില്ലാത്ത അഞ്ച് ഗോളിനാണ് റെഡ്ബുൾ വിജയിച്ചത്.
ഗ്രൂപ്പ് ബിയിലെ മത്സരങ്ങളിൽ അത്‍ലറ്റിക്കോ മാഡ്രിഡിനെ എ.സി മിലാൻ പരാജയപ്പെടുത്തി. ഈ പരാജയത്തോടെ മാഡ്രിഡ് ഗ്രൂപ്പിൽ അവസാന സ്ഥാനത്തായി. എതിരില്ലാത്ത ഒരു ഗോളിനാണ് മിലാൻ ജയിച്ചത്. ഈ ഗ്രൂപ്പിൽ നിന്നും അഞ്ചിൽ അഞ്ചും ജയിച്ച് ലിവർപൂൾ ക്വാർട്ടറിലെത്തി. എഫ്സി പോർട്ടോയെ എതിരില്ലാത്ത രണ്ട് ഗോളിനാണ് ലിവർപൂൾ തോൽപ്പിച്ചത്. ഗോൾരഹിതമായ ആദ്യ പകുതിക്ക് ശേഷം തിയാഗോ, മൊഹമ്മദ് സാല എന്നിവരാണ് ഗോളടിച്ചത്. ഗ്രൂപ്പിൽ 5 പോയിന്റുമായി പോർട്ടോ രണ്ടാം സ്ഥാനത്തും 4 പോയിന്റ് വീതമുള്ള മിലാൻ, മാഡ്രിഡ് എന്നിവർ മൂന്നും നാലും സ്ഥാനത്താണ്. പോർട്ടോക്ക് മാഡ്രിഡുമായിട്ടാണ് അടുത്ത കളി. ഇതിൽ പോർട്ടോ ജയിച്ചാൽ അവർക്ക് പ്രീക്വാർട്ടറിൽ കയറാം.
ഗ്രൂപ്പ് സിയിൽ സ്പോർട്ടിംഗ് സിപി, ബൊറൂസിയ ഡോർട്ട്മുണ്ടിനെ പരാജയപ്പെടുത്തി പ്രീക്വാർട്ടർ പ്രതീക്ഷ നിലനിർത്തി. ഒന്നിനെതിരെ മൂന്ന് ഗോളുകൾക്കാണ് പോർച്ചുഗൽ ക്ലബ്ബിന്റെ വിജയം. ബെസിക്റ്റസിനെ പരാജയപ്പെടുത്തി അയാക്സ് ഗ്രൂപ്പ് ജേതാക്കളായി പ്രീ ക്വാർട്ടർ ഉറപ്പാക്കി. അയാക്സും അഞ്ചിൽ അഞ്ചും വിജയിച്ചു. 22ാം മിനിറ്റിൽ ബെസിക്റ്റസ് മുന്നിലെത്തിയെങ്കിലും പകരക്കാരനായി ഇറങ്ങിയ സെബാസ്റ്റ്യൻ ഹാളറുടെ ഇരട്ട ഗോളുകൾ അയാക്സിനെ വിജയിപ്പിച്ചു. അടുത്ത റൗണ്ടിൽ അയാക്സിനെതിരെ സമനില നേടിയാൽ സ്പോട്ടിംഗ് സിപിക്ക് പ്രീക്വാർട്ടർ ഉറപ്പാക്കാം. എന്നാൽ അയാക്സ് ജയിച്ചാലും സ്പോർട്ടിംഗിന് സാധ്യതയുണ്ട്. ഡോർട്ട്മുണ്ട് വലിയ മാർജിനിൽ വിജയിച്ചാൽ പോലും ഗോൾ ശരാശരിയിൽ സ്പോട്ടിംഗിനൊപ്പം എത്താൻ പ്രയാസമാണ്.
ഗ്രൂപ്പ് ഡിയിൽ നിന്നും ഇന്റർ മിലാൻ, റയൽ മാഡ്രിഡ് ടീമുകൾ പ്രീക്വാർട്ടർ ഉറപ്പാക്കി. ഇന്റർമിലാൻ ഉക്രൈൻ ക്ലബ്ബായ ഷാക്തർ ഡോനെറ്റ്സ്ക്കിനെ എതിരില്ലാത്ത രണ്ടു ഗോളിന് തോൽപ്പിച്ചു. എഡിൻ സെക്കോയുടെ ഇരട്ട ഗോളുകളാണ് ടീമിനെ വിജയിപ്പിച്ചത്. ഗ്രൂപ്പിലെ രണ്ടാം മത്സരത്തിൽ റയൽ മാഡ്രിഡ്, മാൾഡോവ ക്ലബ്ബായ എസ് ഫി ഷരീഫ് ടിറാസ്പോളിനെ തോൽപ്പിച്ചു. എതിരില്ലാത്ത മൂന്ന് ഗോളിനായിരുന്നു റയൽ മാഡ്രിഡന്റെ വിജയം.
ഡേവിഡ് ആൽബ, ടോണി ക്രൂസ്, കരീം ബെൻസേമ എന്നിവരാണ് ഗോളുകൾ നേടിയത്. ഗ്രൂപ്പ് ഡിയിൽ നിന്നും 12 പോയിന്റുമായിട്ടാണ് റയലും 10 പോയിന്റുമായി ഇന്ററും അവസാന പതിനാറിലെത്തുന്നത്.
