ഗോൾ മഴയോടെ യുണൈറ്റഡ് തുടങ്ങി; ബ്രൂണോ ഫെർണാണ്ടസിന് ഹാട്രിക്ക്
സീസണിലെ ആദ്യ മത്സരത്തിൽ മാഞ്ചസ്റ്റർ യുണൈറ്റഡിന് വമ്പൻ വിജയം. ഓൾഡ് ട്രഫോർഡിൽ നടന്ന മത്സരത്തിൽ ഒന്നിനെതിരെ അഞ്ച് ഗോളുകൾക്കാണ് അവർ ലീഡ്സ് യുണൈറ്റഡിനെ പരാജയപ്പെടുത്തിയത്. പോർച്ചുഗീസ് താരം ബ്രൂണോ ഫെർണാണ്ടസ് ഹാട്രിക്ക് നേടിയ മത്സരത്തിൽ നാല് അസിസ്റ്റുകളോടെ പോൾ പോഗ്ബയും തിളങ്ങി. മാസൺ ഗ്രീൻവുഡ്, ഫ്രെഡ് എന്നിവരാണ് മറ്റ് ഗോളുകൾ നേടിയത്. ലീഡ്സിന്റെ ആശ്വാസ ഗോൾ ലൂക്ക് അയ്ലിങ്ങിന്റെ വകയായിരുന്നു.
ആദ്യപകുതിയിൽ പന്ത് കൈവശം വച്ചുകളിച്ചത് ലീഡ്സാണെങ്കിലും യുണൈറ്റഡ് ഗോളവസരങ്ങൾ സൃഷ്ടിക്കാൻ ശ്രമിച്ചു. മുപ്പതാം മിനിറ്റിൽ പോഗ്ബയുടെ അളന്നു മുറിച്ച പാസിൽ നിന്നും പ്രതിരോധനിരയെ കബളിപ്പിച്ച് ബ്രൂണോ ഫെർണാണ്ടസ് ഗോൾനേടി. രണ്ടാം പകുതിയിലാണ് പിന്നീട് അഞ്ച് ഗോളുകൾ പിറന്നത്. നാൽപ്പത്തിയൊമ്പതാം മിനിറ്റിൽ പെനാൽറ്റി ബോക്സിന് വെളിയിൽ നിന്നും അയ്ലിങ്ങ് തൊടുത്ത വെടിയുണ്ട കണക്കെയുള്ള ഷോട്ട് തടുക്കാൻ ഡേവിഡ് ഡിഹ്യക്ക് കഴിഞ്ഞില്ല.
ഗോൾ വീണതോടെ മാഞ്ചസ്റ്റർ ആക്രമണത്തിന്റെ മൂർച്ച കൂട്ടി. അമ്പത്തിരണ്ടാം മിനിറ്റിൽ മാസൺ ഗ്രീൻവുഡും പോഗ്ബയുടെ പാസിൽ നിന്നും ഗോൾ കണ്ടെത്തി. സ്വന്തം ഹാഫിൽ നിന്നും നൽകിയ പാസ് ഇടതുവിങ്ങിലൂടെ സ്വീകരിച്ച ഗ്രീൻവുഡ് അത് ഗോളാക്കി മാറ്റി. തൊട്ടുപിന്നാലെ അടുത്ത ഗോൾ വന്നു. അതും അമ്പത്തിനാലാം മിനിറ്റിൽ പോഗ്ബയുടെ പാസിൽ നിന്നും. ഗോൾലൈൻ കടന്ന പന്ത് ലീഡ്സ് ഡിഫെന്റർ തട്ടിയകറ്റിയെങ്കിലും ഗോൾ ലൈൻ ടെക്നോളജി ഉപയോഗിച്ച് റഫറി ഗോൾ വിധിച്ചു. അറുപതാം മിനിറ്റിൽ ബ്രൂണോ ഫെർണാണ്ടസ് ഹാട്രിക്ക് തികച്ചു. ഇത്തവണ അസിസ്റ്റ് ലിന്റലോഫ് വക. അറുപത്തിയെട്ടാം മിനിറ്റിൽ വീണ്ടും പോഗ്ബ ഗോളിലേക്കുള്ള വഴി തുറന്നു. ഇത്തവണ ഗോളടിക്കാനുള്ള അവസരം ബ്രസീലിയൻ താരം ഫ്രെഡിന്.
മത്സരത്തിന്റെ എഴുപത്തിനാലാം മിനിറ്റിൽ ഡാനിയേൽ ജെയിംസിനെ പിൻവലിച്ച് കോച്ച് സോൾഷ്യർ ജാഡൻ സാഞ്ചോയെ ഇറക്കി. മത്സരത്തിന് മുൻപ് ഓൾഡ് ട്രഫോർഡിൽ വച്ച് റാഫേൽ വരാനയേയും ക്ലബ് കാണികൾക്ക് മുന്നിൽ പരിചയപ്പെടുത്തി . പത്തൊമ്പതാം നമ്പർ ജഴ്സിയിലാണ് വരാനെ കളിക്കുക.
