രാഹുൽ നയിച്ചു; ചെന്നൈ സൂപ്പർ കിംഗ്സിനെ തകർത്ത് പ്ലേഓഫ് സാധ്യത നിലനിർത്തി പഞ്ചാബ്
![ipl](https://newsmoments.in/static/c1e/client/89487/uploaded/c97aca534bda85fc192086dc813fdf9a.webp)
നായകൻ കെ.എൽ രാഹുലിന്റെ മികച്ച ഇന്നിംഗ്സിന്റെ ബലത്തിൽ ചെന്നൈ സൂപ്പർ കിംഗ്സിനെ തകർത്ത് പഞ്ചാബ് കിംഗ്സ് ഐപിഎൽ പ്ലേഓഫ് പ്രതീക്ഷ നിലനിർത്തി. ചെന്നൈ ഉയർത്തിയ 134 റൺസ് വിജയലക്ഷ്യം പുറത്താകാതെ 98 റൺസ് നേടിയ രാഹുലിന്റെ മികവിൽ പഞ്ചാബ് 13 ഓവറിൽ മറികടന്നു. ഇതോടെ ലീഗിലെ കളികൾ അവസാനിച്ചപ്പോൾ പഞ്ചാബിന് 12 പോയിന്റായി. ഇനി കൊൽക്കത്ത- രാജസ്ഥാൻ മത്സരത്തെ ആശ്രയിച്ചിരിക്കും പഞ്ചാബിന്റെ സാധ്യതകൾ
ടോസ് നേടിയ പഞ്ചാബ് ബൗളിംഗ് തെരഞ്ഞെടുത്തു. മൂന്നാം ഓവറിലെ അവസാന പന്തിൽ മികച്ച ഫോമിലുള്ള ഗെയ്ക്വാദിനെ(12) അർഷ്ദീപ് പട്ടേൽ പുറത്താക്കി. പിന്നാലെ മൂന്ന് വിക്കറ്റുകൾ കൂടി തുടരെ വീണു. റണ്ണെടുക്കാതെ മോയിൻ അലി, 2 റൺസുമായി ഉത്തപ്പ, 4 റൺസുമായി റായിഡു എന്നിവർ പുറത്ത്. പിന്നീടെത്തെയ ധോണിക്കും കാര്യമായി ഒന്നും ചെയ്യാനായില്ല. 12 റണ്ണെടുത്ത് ധോണിയും പുറത്തായി. എന്നാൽ ഒരറ്റത്ത് ഉറച്ചു നിന്ന ഫാഫ് ഡുപ്ലസി മികച്ച ബാറ്റിംഗിലൂടെ ടീമിനെ പൊരുതാനാവുന്ന സ്കോറിലെത്തിച്ചു. 55 പന്തിൽ 76 റൺസെടുത്ത് ഡുപ്ലസി പുറത്തായി. ജഡേജ 15 റൺസ് നേടി. ജോർദ്ദാൻ,അർഷ്ദീപ് എന്നിവർ 2 വിക്കറ്റ് വീതം വീഴ്ത്തി.
മായങ്ക് അഗർവാൾ(12) പഞ്ചാബ് ഇന്നിംഗ്സിന്റെ തുടക്കത്തിലേ പുറത്തായെങ്കിലും രാഹുൽ തകർത്തടിച്ചു. ഒരറ്റത്ത് വിക്കറ്റുകൾ കൊഴിയുമ്പോഴും രാഹുൽ സ്കോറിംഗ് നിരക്ക് ഉയർത്തിക്കൊണ്ടു വന്നു. 42 പന്തിൽ 8 സിക്സും 7 ഫോറും പായിച്ചാണ് രാഹുൽ 98 റൺസെടുത്തത്. 13ആം ഓവറിൽ കളി തീർന്നു. ഷർദൂൽ താക്കൂർ 3 വിക്കറ്റ് വീഴ്ത്തി.