സമനിലയിൽ കുരുങ്ങി റയൽ, മാൻയു,യുവന്റസ്. ചെൽസിക്കും ബയേണിനും ജയം

യൂറോപ്യൻ ലീ​ഗുകളിലെ വാരാന്ത്യ മത്സരങ്ങളിൽ ചെൽസിക്കും ബയേണിനും അത്‍ലറ്റിക്കോ മാഡ്രിഡിനും ജയം. അതേസമയം ഞായറാഴ്ച്ച നടന്ന മത്സരങ്ങളിൽ റയൽ മാഡ്രിഡ്, മാഞ്ചസ്റ്റർ യുണൈറ്റഡ്, യുവന്റസ് എന്നിവർ സമനിലയിൽ കുരുങ്ങി. ചെൽസിക്കായി കളിക്കാനിറങ്ങിയ റൊമേലു ലുക്കാക്കു ​ഗോളോടെ രണ്ടാം വരവ് ​ഗംഭീരമാക്കി.

പ്രീമിയർ ലീ​ഗ്

ആഴ്സണലിനെ എമിറേറ്റ്സ് സ്റ്റേഡിയത്തിൽ എതിരില്ലാത്ത രണ്ടു ​ഗോളുകൾക്കാണ് ചെൽസി തോൽപ്പിച്ചത്. ഒരു ​ഗോളടിച്ചും ഒരു അസിസ്റ്റൻസ് നൽകിയും റീസേ ജെയിംസ് തിളങ്ങിയ കളിയിൽ പതിനഞ്ചാം മിനിറ്റിൽ തന്നെ ലുക്കാക്കു ​ഗോളടിച്ചു. മുപ്പത്തിയഞ്ചാം മിനിറ്റിലാണ് മേസൻ മൗണ്ടിന്റെ പാസിൽ നിന്നും ജെയിംസ് ​ഗോൾ നേടിയത്. ഇതോടെ രണ്ട് കളിയിൽ നിന്നും ചെൽസിക്ക് 6 പോയിന്റായി. ആഴ്സണലാകട്ടെ ആദ്യ രണ്ട് മത്സരവും തോൽക്കുകയും ചെയ്തു.

മാഞ്ചസ്റ്റർ യുണൈറ്റ‍് എവേ മത്സരത്തിൽ സൗത്താപ്റ്റണുമായിട്ടാണ് സമനിലയിലായത്. മുപ്പതാം മിനിറ്റിൽ ഫ്രെഡിന്റെ ഓൺ ​ഗോളും അമ്പത്തിയഞ്ചാം മിനിറ്റിൽ മേസൺ ​ഗ്രീൻവുഡിന്റ ​ഗോളുമാണ് മത്സരത്തിൽ പിറന്നത്. പോ​ഗ്ബയു‌ടെ അസിസ്റ്റിലാണ് ​ഗ്രീൻ വുഡിന്റെ ​ഗോൾ.

ലീ​ഗിലെ രണ്ടാം കളിയിലും വിജയിച്ച് ടോട്ടനം ഹോട്ട്സ്പർസും പോയന്റ് പട്ടികയിൽ മുന്നിൽ കയറി. ആദ്യ മത്സരത്തിൽ സിറ്റിയെ പരാജയപ്പെടുത്തിയ സ്പർസ് എതിരില്ലാത്ത ഒരു ​ഗോളിന് വൂൾവ്സിനെയാണ് തോൽപ്പിച്ചത്. ദലേ അലി ആണ് ​പെനാൽറ്റിയിലൂടെ ​ഗോൾ കണ്ടെത്തിയത്. എഴുപത്തിരണ്ടാം മിനിറ്റിൽ ഹാരി കെയ്ൻ കളിക്കാനിറങ്ങി. 

ലാലീ​ഗ

ലാലീ​ഗയിൽ റയൽ മാഡ്രിഡിനെ ലവാന്റെയാണ് സമനിലയിൽ പിടിച്ചത്. ഇരു ടീമുകളും മൂന്ന് ​ഗോളുകൾ വീതം നേടി. വനീഷ്യസി ജൂനിയറിന്റെ ഇരട്ട ​ഗോളുകളും ​ഗരത്ത് ബെയിലിന്റെ ​തിരിച്ചുവരൽ ​ഗോളുമാണ് റയലിനെ രക്ഷിച്ചെടുത്തത്. ആദ്യം ലീഡ് എടുത്തെങ്കിലും രണ്ടു തവണ പിന്നിട്ടു നിന്ന ശേഷമാണ് റയൽ തിരിച്ചു കയറിയത്. റോജർ മാർട്ടി, ജോസ് കമ്പാന, റോബി പിയർ എന്നിവർ ലവാന്റെയുടെ ​ഗോളുകൾ നേടി. 

നിലവിലെ ജേതാക്കളായ അത്‍ലറ്റിക്കോ മാഡ്രിഡ് എതിരില്ലാത്ത ഒരു ​ഗോളിന് എൽഷേെ തോൽപ്പിച്ചു. എയ്ഞ്ചൽ കൊറേയയാണ് ​ഗോൾ നേടിയത്. ഇതോടെ ലീ​ഗിലെ ആദ്യ രണ്ട് കളികളിലും ജയിച്ച് അത്‍ലറ്റിക്കോ മാഡ്രിഡ് പോയിന്റ് പട്ടികയിൽ മുന്നിലെത്തി. 

ബുഡേസ്‍ലീ​ഗ

ബയൺ മ്യൂണിക്ക് രണ്ടിനെതിരെ മൂന്ന് ​ഗോളുകൾക്കാണ് കൊളോൺ എഫ്സിയെ തോൽപ്പിച്ചത്. സെർജി ​ഗനാബ്രിയുടെ ഇരട്ട ​ഗോളും ലവന്റേവ്സക്കിയുടെ ​ഗോളുമാണ് ബയേണിന്റെ വിജയം ഉറപ്പിച്ചത്. ആദ്യ കളി സമനിലയിൽ കുടുങ്ങിയ ബയേണിന് രണ്ട് മത്സരത്തിൽ നിന്നും നാല് പോയിന്റായി. ഹോഫൻഹെയ്മും എഫ്സി ബർലിനും തമ്മിലുള്ള മത്സരം സമനിലയിലായി. രണ്ട് ടീമുകളും രണ്ട് ​ഗോളുകൾ വീതം നേടി.

സിരി എ

ഇറ്റാലിയൻ ലീ​ഗിൽ കരുത്തരായ യുവന്റസ് സമനിലയിൽ കുരുങ്ങി. രണ്ട് ​ഗോളുകൾ നേടി മുന്നിട്ടു നിന്ന ശേഷമാണ് റയൽ , ഉഡിനസുമായി സമനില വഴങ്ങിയത്. മൂന്നാം മിനിറ്റിൽ പൗളോ ഡിബാലയും ഇരുപത്തിമൂന്നാം മിനിറ്റിൽ യുവാൻ ക്വാഡ്രാഡോയുമാണ് ​ഗോളടിച്ചത്. എന്നാൽ അമ്പത്തിഒന്നാം മിനിറ്റിൽ റോബർട്ടോ പെരേര പെനാൽറ്റിയിലൂടേയും എൺപത്തിമൂന്നാം മിനിറ്റിൽ ജറാൾ ദിയേഫുവും ​ഉഡിനിസിനു വേണ്ടി ​ഗോളടിച്ചു.