ലിവർപൂളിനും ആഴ്സണലിനും വിജയം; മാഞ്ചസ്റ്റർ സിറ്റിക്ക് സമനില

ഇം​ഗ്ലീഷ് പ്രീമിയർ ലീ​ഗിലെ അഞ്ചാം റൗണ്ട് മത്സരങ്ങളിൽ ലിവർപൂളിനും ആഴ്സണലിനും വിജയം. അതേസമയം നിലവിലെ ജേതാക്കളായ മാഞ്ചസ്റ്റർ സിറ്റി സൗത്താംപ്റ്റണുമായി ​ഗോൾ രഹിത സമനിലയിൽ കുരുങ്ങി. എവർട്ടണെ പരാജയപ്പെടുത്തി ആസ്റ്റൺ വില്ല രണ്ടാം ജയം സ്വന്തമാക്കി.

ആൻഫീൽഡിൽ നടന്ന മത്സരത്തിൽ ക്രിസ്റ്റൽ പാലസിനെ എതിരില്ലാത്ത മൂന്ന് ​ഗോളുകൾക്കാണ് ലിവർപൂൾ പരാജയപ്പെടുത്തിയത്. സാദിയോ മാനേ, മുഹമ്മദ് സല, നാബി കീറ്റ എന്നിവരാണ് ലിവർപൂളിന് വേണ്ടി ​ഗോളുകൾ സ്ക്കോർ ചെയ്തത്. ഇതോടെ അ‍ഞ്ച് കളികളിൽ നിന്നും 13 പോയിന്റോടെ ലിവർപൂൾ പട്ടികയിൽ ഒന്നാമതാണ്. സാദിയോ മാനേയുടെ ലിവർപൂളിന് വേണ്ടിയുള്ള നൂറാം ​ഗോളായിരുന്നു ഇത്. 

തുടർച്ചയായ മൂന്ന് തോൽവികൾക്ക് ശേഷം അഴ്സണൽ രണ്ടാം  വിജയം സ്വന്തമാക്കി. ബേൺലിയെ എതിരില്ലാത്ത ഒരു ​ഗോളിന് തോൽപ്പിച്ചാണ് ആഴ്സണൽ വിജയിച്ചത്. മറ്റൊരു മത്സരത്തിൽ ആസ്റ്റൺ വില്ല, എതിരില്ലാത്ത മൂന്ന് ​ഗോളിന് എവർട്ടണെയും തോൽപ്പിച്ചു. 

നിലവിലുള്ള ചാമ്പ്യന്മാരായ മാഞ്ചസ്റ്റർ സിറ്റിയെ സൗത്താംപറ്റൺ ​ഗോൾരഹിത സമനിലയിൽ തളച്ചു.